Shefi i Departamentit të Thesarit të SHBA-së raporton suksese në izolimin e Iranit

Sekretari amerikan i Thesarit, Scott Bessent, deklaroi të shtunën se kishte dërguar “përfaqësues” në mbarë botën për të ushtruar presion mbi shtetet që ta izolonin ekonomikisht Iranin, duke vlerësuar kufizimet e reja që synojnë linjat ajrore dhe bankat e këtij vendi.

“Me udhëzimin tim, ekipe të ndryshme u dërguan nëpër botë për të bashkëpunuar me shtetet dhe për të kërkuar veprime kundër regjimit iranian”, shkroi ai në platformën X.

Dhe sipas tij, “këto përpjekje po japin rezultate”.

Bessent vuri në dukje se Turqia dhe Omani kanë pezulluar fluturimet hyrëse të kompanisë private “Mahan Air”, ndërsa Emiratet e Bashkuara Arabe kanë ndaluar të gjitha fluturimet e linjave ajrore iraniane.

Dubai, qendra tregtare e Emirateve të Bashkuara Arabe, është një destinacion kryesor për linjat ajrore iraniane, me fluturime të shumta ditore, një komunitet të madh iranian dhe lidhje të ngushta biznesi.

Agjencia iraniane e lajmeve ISNA, duke cituar zyrtarë, raportoi se pesë shtete kishin revokuar lejet e fluturimit për Iranin: Azerbajxhani, Gjeorgjia, Iraku, Omani dhe Emiratet e Bashkuara Arabe.

Megjithatë, agjencia bëri të ditur se fluturimet vazhdonin drejt Kinës – e cila refuzon t’i nënshtrohet presionit amerikan – dhe Rusisë, përmes dy linjave kryesore ajrore: kompanisë kombëtare “Iran Air” dhe “Mahan”.

“Mahan” kishte njoftuar se nuk do të operonte më në Turqi me kërkesë të autoriteteve turke, por fluturimet vazhdojnë disa herë në ditë në të dyja drejtimet, përmes “Iran Air” ose kompanive më të vogla iraniane, sipas faqeve të internetit të aeroporteve të Teheranit dhe Stambollit.

ISNA raportoi se shërbimet vazhdonin gjithashtu edhe me Afganistanin, Armeninë, Bjellorusinë, Malajzinë, Pakistanin dhe Taxhikistanin.

Të hënën, Bessent kishte deklaruar se të gjitha linjat ajrore iraniane “do të mbyllen në mbarë botën”.

Ai gjithashtu theksoi kufizimet e reja bankare.

Të mërkurën, Banka Qendrore e Emirateve të Bashkuara Arabe bllokoi transaksionet drejt dhe nga Irani për degët e bankës iraniane “Bank Melli”, duke e akuzuar atë për shkelje të ligjeve mbi pastrimin e parave, terrorizmin dhe përhapjen e armëve.

Javën e kaluar, Turqia revokoi licencën e bankës iraniane “Bank Mellat”, një entitet financiar gjysmë-privat që prej vitesh u nënshtrohet sanksioneve perëndimore.

Një artikull i Wall Street Journal, i shpërndarë nga Bessent, bënte të ditur se Jonathan Burke – Ndihmëssekretari i Departamentit të Thesarit përgjegjës për çështjet e financimit të terrorizmit – udhëtoi nëpër Lindjen e Mesme dhe Evropë gjatë një periudhe dyjavore për të promovuar planin e vendosjes së asaj që Bessent e quajti një “Ditë D ekonomike” ndaj Teheranit.

Departamenti amerikan i Thesarit ka zhvilluar diskutime me më shumë se 50 vende, raportoi Journal.