Milan Radoiçiqi është larguar nga Serbia, ka shkuar në Rusi – thotë ish-inspektori i BIA-s

Ish-inspektori i pavarur i Agjencisë së Sigurisë dhe Informacionit, Milan Zvezdanoviq, ka deklaruar se ka informacione jozyrtare se Milan Radoiçiq është larguar nga territori i Serbisë.

Zvezdanoviq, në një paraqitje të ftuar në programin televiziv N1, tha se sipas informacioneve të tij nga Agjencia e Sigurisë dhe Informacionit, Milan Radoiçiq shkoi në Rusi, shkruajnë mediat serbe.

Kur u pyet nëse ai u largua nga territori i Serbisë me leje apo ilegalisht, ai tha se Partia Progresive Serbe është ende në pushtet.

“Ai nuk kishte nevojë për leje”, citohet të ketë thënë ai.

Sipas tij, largimi i Radoiçiq nga vendi shqetësoi “madje edhe atë pjesë të majës së BIA-s që kishte biznes, skema kriminale me të”.

Siç kujtojnë mediat serbe, pasaporta e Radoiçiq u konfiskua me vendim të gjykatës dhe atij iu ndalua të largohej nga vendi, dhe iu urdhërua të paraqitej në stacionin policor kompetent më 1 dhe 15 të çdo muaji.

Mediumi N1 ka thënë se i shkroi Gjykatës së Lartë që më 29 tetor, duke kërkuar informacion nëse Radoiçiq raporton rregullisht, por nuk morën përgjigje.

Ndryshe, Radoiçiq – një biznesmen kontravers dhe ish-nënkryetar i Listës Serbe – është subjekt i një urdhri-arresti të Interpolit për shkak të ngjarjeve në Banjskë, për të cilat ai ka marrë përsipër përgjegjësinë.

Ai kërkohet nga autoritetet kosovare për organizimin dhe pjesëmarrjen në sulmin terrorist në Banjskë, më 24 shtator 2023, ku mbeti i vrarë rreshteri i Policisë së Kosovës, Afrim Bunjaku.