Oligarku i afërt me Kremlinin uron studentët serbë, rikthen sloganin nacionalist për Kosovën

Konstantin Malofeev, oligark rus i afërt me Kremlinin dhe pronar i televizionit Tsargrad TV, e ka cilësuar fitoren e Listës Studentore në zgjedhjet parlamentare në Serbi si një verdikt historik kundër regjimit të Aleksandar Vuçiqit, duke e paraqitur lëvizjen si forcë patriotike dhe mike të Rusisë.

Në një reagim të publikuar në platformën Multipolar Press, Malofeev deklaroi se populli serb ka dhënë një “verdikt historik” ndaj regjimit të Vuçiqit, duke shtuar se zhvillimet e fundit kanë vërtetuar paralajmërimet që, sipas tij, televizioni Tsargrad i kishte bërë prej vitesh.

Ai e akuzoi ish-presidentin serb se kishte ndjekur një politikë të dyfishtë, duke u përpjekur të ruante njëkohësisht marrëdhëniet me Perëndimin dhe Rusinë.

“Për vite me radhë, Aleksandar Vuçiq u përpoq me hipokrizi të balanconte midis Perëndimit dhe Rusisë, duke mbajtur maskën e një patrioti serb para kamerave, ndërsa në të njëjtën kohë tradhtonte vazhdimisht interesat kombëtare të Serbisë për hir të Brukselit dhe Uashingtonit”, shkroi Malofeev.

Sipas tij, regjimi i Vuçiqit ishte përpjekur t’i paraqiste protestuesit e rinj dhe studentët serbë si “agjentë perëndimorë” dhe pjesëmarrës në një “revolucion me ngjyra”.

“Por nuk është e mundur të mashtrosh serbët”, theksoi oligarku rus.

Malofeev e përshkroi Listën Studentore si një lëvizje patriotike dhe kundërshtare të agjendës liberale pro-perëndimore.

Ai pretendoi se ajo përbëhet nga patriotë serbë dhe mbështetës të Rusisë, për të cilët, sipas tij, “nderi i atdheut dhe vëllazëria ortodokse” janë më të rëndësishme se fondet evropiane.

Në fund të reagimit të tij, Malofeev i përshëndeti mbështetësit e Listës Studentore me mesazhin: “Urime, vëllezër! Kosova është Serbi, Krimea është Rusi!”

Reagimi i tij vjen pas fitores së Listës Studentore në zgjedhjet e jashtëzakonshme parlamentare në Serbi, të mbajtura më 25 tetor, sipas rezultateve paraprake të raportuara.

The GeoPost