Zelensky thotë se Lituania ofron mbështetje për furnizimet me gaz

Lituania i ka ofruar Ukrainës mbështetje me furnizime me gaz gjatë sezonit të ngrohjes.

Kjo u njoftua në rrjetin social X nga Presidenti Volodymyr Zelensky pas bisedimeve me homologun e tij lituanez Gitanas Nausėda, sipas Ukrinform.

“Një bisedë e mirë me Presidentin lituanez Gitanas Nausėda. Lituania na ka ndihmuar shumë që nga fillimi i kësaj lufte dhe ne e vlerësojmë shumë të gjithë mbështetjen e ofruar. Tani, para fillimit të dimrit, kur kemi nevojë për mbështetje energjetike, Lituania është përsëri gati të na ndihmojë. Gitanas ofroi mbështetje me gaz. Faleminderit për këtë. Ne ramë dakord që ekipet tona do të punojnë për këtë,” tha Zelensky.

Sipas tij, biseda preku edhe kërcënimet e mundshme ndaj Lituanisë nga Bjellorusia përmes sulmeve hibride që përfshijnë valë migrantësh dhe objekte ajrore.

“Unë ofrova ndihmën tonë. Ne do të punojmë për të siguruar siguri më të madhe në rajonin tonë dhe në Lituaninë mike. Ne gjithashtu ramë dakord për qëndrimet tona në diplomaci dhe koordinuam masat për të ardhmen e afërt,” tha Presidenti i Ukrainës.

Ai gjithashtu informoi liderin lituanez për situatën në fushën e betejës. “Ushtarët tanë po mbajnë vijën e mbrojtjes pavarësisht narrativave ruse në media,” theksoi Zelensky.

Siç u raportua, më 4 nëntor, Zelensky tha se nga 2 miliardë dollarësh që i nevojiten Ukrainës për të importuar gaz gjatë sezonit të ngrohjes, mungojnë 750 milionë dollarë./Ukrinform/