Vuçiq kërkoi të flasë me Putinin, Kremlini: Bisedimet i kemi në nivele të larta, takimi sa më shpejt të jetë e mundur

Presidenti serb, Aleksandar Vuçiq, ka folur sërish për sanksione amerikane kundër Industrisë së Naftës së Serbisë (NIS). Më 4 janar në mbledhjen e Qeverisë së Serbisë, Vuçiq tha se nënsekretari amerikan i Shtetit për Rritje Ekonomike, Energji dhe Ambient, Jose Fernandez, i ka konfirmuar që Shtetet e Bashkuara do të vendosin sanksione.

“Ata do të vendosin sanksione, jo vetëm financiare, por sanksione të plota ndaj kompanisë NIS. Këto nuk do të jenë sanksione kundër kompanive që janë në pronësi ruse, apo që financohen nga bankat ruse, por do të jenë sanksione të drejtpërdrejta ndaj kompanisë tonë NIS”, ka thënë Vuçiq. Vuçiq tha se lidhur me këtë çështje planifikon të dërgojë një kërkesë për bisedë me Putinin për 25-27 janar.

Kësaj kërkese i është përgjigjur Kremlini, i cili tha se bisedimet me Serbinë i kanë në nivelet me të larta, ndërsa shumë shpejt do të koordinohen për një bisedë të re. “Bisedimet me miqtë dhe partnerët tanë janë në nivelet më të larta dhe të tjera do të koordinohen sa më shpejt që të jetë e mundur”, tha zëdhënësi i Kremlinit për TASS kur u pyet për gatishmërinë për të organizuar një bisedë midis Putinit dhe Vuçiqit.

Vuçiq tha se SHBA do t’i shpallë zyrtarisht sanksionet deri më 15 janar. Më pas Beogradi do të ketë 30 ditë kohë deri më 15 shkurt për të marrë masa. Prej vitit 2008, NIS-i është në pronësi të kompanisë shtetërore ruse, Gazprom Neft dhe kompanisë së saj amë, Gazprom. Bashkimi Evropian dhe Shtetet e Bashkuara e kanë futur Gazprom Neftin në listë të zezë më 2014, pasi Rusia pati aneksuar Gadishullin ukrainas të Krimesë. Shumica e aksionerëve të NIS janë Gazprom (56,15% e aksioneve) dhe shteti serb (29,87%)./TheGeopost/