Top propagandat ruso-serbe gjatë javës që lamë pas

Serbia edhe gjatë javës që lamë pas vijoi linjën e propagandës ruse. Këtë herë ishte ambasadori i Serbisë në SHBA, Marko Gjuriq, që në mediumin serb Tanjug, tha se nuk i beson kryeministrit të Kosovës Albin Kurti se është shtyrë vendimi i Bankës Qendrore të Kosovës për dinarin, për tre muaj.

Derisa vendimi i Bankës Qendrore të Kosovës ka për qëllim të luftojë krimin financiar duke përjashtuar në këtë rast të gjitha valutat tjera përveç euros, në Serbi është proklamuar e kundërta. Vetë Gjuriq, më 12 shkurt deklaroi rrejshëm se si rezultat i vendimit të mëparshëm të BQK-së, “shkollat dhe spitalet në vendbanimet serbe nuk po mund të funksionojnë”.

Ai dezinformoi pasi Banka Qendrore e Kosovës ka shtyrë vendimin për tre muaj dhe ka marrë një sërë masash lehtësuese për komunitetin serb gjatë fazës së tranzicionit. Me fillimin e zbatimit të rregullores së re të e saj, BQK kishte deklaruar se ajo nuk ndalon apo kufizon pranimin e mjeteve në llogaritë bankare në euro në bankat e licencuara dhe se nuk kufizon aktivitetin këmbimor të cilësdo valutë që kryhen nga institucionet financiare bankare ose jo-bankare, por që janë të licencuara nga ajo.

Ndërsa “Eksodi për në Perëndim: 54 nxënës kanë lënë vetëm një shkollë në Ferizaj pas liberalizimit të vizave”, ishte titulli i një artikulli të publikuar më 12.02.2024 ne RT Balkan. Me këtë titull ‘clickbait’, ky medium mundohet ta bëjnë lajmin e  vet sa më propagandues, duke vazhduar narrativën e migrimit dhe spastrimit etnik, por tani duke u marrë edhe me komunat shqiptare.

Artikulli në fjalë është marrë në një shkrim të Demokracia edhe Radio Televizioni i Kosovës (RTK) me titullin që ekzagjeron shkrimin sepse nuk ka migrim masiv siç paraqitet në këtë portal.

Gjatë javës që lamë pas Kisha Ortodokse Serbe shtrembëroi faktet dhe propagandoi në kanalet ruse pro Kremlinit.  Ishte peshkopi Teodosi, i cili tha se gjoja “populli serb në Kosovë është i kërcënuar me zhdukje”, deklaratë që u publikua nga agjencia ruse RIA Novost në një tekst të titulluar “Serbët nga Kosova rrezikohen me zhdukje”.

“Ne që jetojmë sot në atë territor jemi në një situatë ku shumë po largohen nga ne, shumë miq, shumë njerëz, kur retë e errëta varen mbi ne dhe kur njerëzit kanë frikë, kur kërcënohen nga të gjitha anët, por më e madhja – me të cilën do të zhdukemi nga territori, të largohen nga shtëpitë e tyre”, pretendoi ipeshkvi Teodosije.

Ai iu drejtua kështu besimtarëve të mbledhur së fundmi në Manastirin e Draganacit, porse një gjë e tillë nuk është e vërtetë pasi që serbët nga Kosova nuk kërcënohen në asnjë mënyrë nga vendimi i BQK-së për futjen e euros si mjet i vetëm i pagesës, e as informacioni i Beogradit se gjoja 14% të serbëve u larguan nga Kosova brenda një viti./G. Venhari-The Geopost/