Shkup: Një kompani ruse tentoi të fitojë një tender sensitiv në Ministrinë e Mbrojtjes

Një kompani ruse me seli në një vend të Bashkimit Evropian (BE) ka tentuar të marrë një tender nga Ministria e Mbrojtjes e Maqedonisë së Veriut për të furnizuar këtë institucion me “pajisje specifike”.
Në një brifing me gazetarë të hënën, ministrja e Mbrojtjes Slavjanka Petrovska tha se dyshimi ka lindur në momentin që kompania ka ulur për 50 për qind çmimin e ofertës, me qëllim që ta marrë tenderin me çdo kusht.

“Në fazën e parë oferta e kësaj kompanie ishte pothuajse e njëjtë me dy kompanitë e tjera, kështu që nuk ndryshonte shumë, ndoshta për disa qindra mijëra euro. Por, në fazën e dytë ajo uli ofertën duke e bërë gati 50 për qind më të lirë. Kjo na konfirmoi dyshimin se ata donin ta merrnin me çdo kusht”, tha ministrja.

Kompania është e regjistruar në një shtet anëtar të BE-së me qëllim që të paraqitet si relevante në treg. Petrovska tha se edhe para se të bëhej kontrolli i sigurisë, shërbimet inteligjente maqedonase kanë alarmuar se bëhet fjalë për një kompani ruse të dyshimtë.

Sipas Kodit Penal, Petrovska thotë se nuk ka bazë për krim, por se “mbrojtja e sigurisë së shtetit duhet të ngrihet në një nivel më të lartë”.
Maqedonia Veriut është vend anëtar i NATO-s dhe këtë muaj shënon katërvjetorin e anëtarësimit në Aleancë. Duke qenë një vend i vogël dhe me institucione jo të konsoliduara, Maqedonia e Veriut është gjetur në shënjestër të Rusisë që nga viti 2018, kur vendi arriti Marrëveshjen e Prespës me Greqinë, e cila zgjodhi kontestin disadekadësh për emrin, i cili mbante të bllokuar perspektivën euroatlantike të vendit./The Gepost-