Serbia prapë nuk i bashkohet Perëndimin për Ukrainën, nuk mori pjesë në Platformën e Krimesë

Ministri i Jashtëm serb, Ivica Daçiq, ka mohuar pretendimet se Serbia i është bashkuar Platformës së Krimesë, një nismë diplomatike ndërkombëtare që ka nisur Presidenti i Ukrainës Volodymyr Zelensky në mbrojtje të vendit të tij.

“Serbia nuk iu bashkua Platformës së Krimesë, por kryeministrja (Ana Brnabić) mori pjesë në atë takim përmes një video-telefonate. Mirëpo, ajo nuk e ka shprehur mbështetjen e saj, e as nuk e kemi pranuar tekstin e dokumentit të platformës së Krimesë”, tha Daçiq për Televizionin Pink.

Platforma e Krimesë ishte një samit diplomatik i iniciuar nga Volodymyr Zelenskyy në gusht 2021 dhe ku morën pjesë delegacione nga 46 vende, të gjitha vendet perëndimore përfshirë edhe anëtarët e G7. Ajo është projektuar të jetë një mekanizëm koordinues ndërkombëtar për të kthyer Krimenë e aneksuar nga Rusia më 2014. Mbrojtja e të drejtave të njeriut të tatarëve të Krimesë, degradimi i mjedisit dhe mbytja e tregtisë në rajonin e Detit të Zi dhe Azov janë gjithashtu çështje të diskutuara në samit.

Në vend të pjesëmarrjes, shefi i diplomacisë serbe u takua me ambasadorin rus, Aleksandr Botsan-Kharçenko, për ta marrë përgëzimin që nuk u bë pjesë e shteteve perëndimore në Platformën e Krimesë.
Daçiq tha se qëndrimi i Serbisë për atë platformë është pritur me komente pozitive në Rusi.

“Ai (ambasadori) më dha një letër nga Reshetnikov, homologu im rus. Ne jemi bashkëkryetarë të Komitetit të përzier për Bashkëpunim. Në letër flitej kryesisht për çështje ekonomike dhe të tjera dhe për organizimin e takimeve. I sugjerova që të caktojnë datat e vizitave zyrtare, dmth për bisedimet mes bashkëpresidentëve, ministrave të tjerë dhe natyrisht mundësinë e takimit me ministrin e Jashtëm të Rusisë, Sergej Lavrov”, shtoi Daçiq.

Zëvendës Sekretari i Përgjithshëm i NATO-s, Mircea Geoana, shprehu mbështetjen e palëkundur të organizatës për Ukrainën gjatë Samitit të Tretë të Platformës Ndërkombëtare të Krimesë të mbajtur më 23 gusht 2023.
Duke theksuar përpjekjet e vazhdueshme të Aleancës, Zëvendës Sekretari i Përgjithshëm theksoi rëndësinë e mbështetjes së vazhdueshme ushtarake për Ukrainën. Ai vuri në dukje vendimet e fundit nga vendet anëtare, si Holanda dhe Danimarka, për të furnizuar Ukrainën me avionë luftarakë F-16./The Geopost/