Kosova avancon statusin në NATO, pavarësisht përpjekjeve të Serbisë për ta ndaluar

Asambleja Parlamentare e NATO-s me shumicë votash ka miratuar statusin e Kuvendit të Kosovës.

Kosova tashmë në këtë asamble do të ketë statusin e asocuar.

Për këtë zhvillim pozitiv për vendin, ka reaguar edhe deputeti Driton Hyseni, i cili është edhe kryesues i delegacionit kosovar në Asamblenë Parlamentare të NATO-s.

“Avancimi i statusit vjen pas disa viteve të bashkëpunimit të shkëlqyeshëm mes Kuvendit të Republikës së Kosovës dhe Asamblesë Parlamentare të NATO-s. Nga qershori i vitit 2014, ne përfaqësoheshim si delegacion vëzhgues. Letrat e shumta e përpjekjet e vazhdueshme të delegacionit të Serbisë por edhe të akterëve tjerë politik në Beograd nuk ja dolën të ndalin Kosovën drejt avancimit të statusit. Ju përcjell urimet më të përzemërta nga Sofje e Bullgarisë. I priftë e mbara Kosovës tonë!”, ka shkruar ai në Facebook.

Ndërkaq, në këtë votim vetëm një votë ishte kundër.

Asambleja Parlamentare e NATO-s është institucionalisht e ndarë nga NATO-ja, por shërben si një lidhje e rëndësishme mes NATO-s dhe parlamenteve të vendeve anëtare. Ajo përbëhet nga 281 delegatë nga të 32 vendet anëtare të NATO-s.

Anëtarët e asociuar mund të paraqesin rezoluta dhe ndryshime në rezoluta. Gjithashtu, mund të shërbejnë si raportues specialë të asociuar në komitete, për të paraqitur perspektivat e tyre në raportet NATO-Asamble Parlamentare./TheGeopost/