Bosnja gjykon ish-ushtarët serbë për krime kundër të burgosurve civilë

Ish-komandanti dhe anëtarët e kohës së luftës të Brigadës së Zvornikut të Ushtrisë Serbe të Bosnjës dolën në gjyq në Sarajevë për ndalimin e paligjshëm dhe trajtimin çnjerëzor të burrave dhe djemve boshnjakë, disa prej të cilëve u vranë.

Të hënën u hap në gjykatën shtetërore të Bosnjës gjyqi për Vidoje Blagojeviçin, Ivan Arapoviçin, Milan Arapoviçin, Kosta Pejiçin, Bozo Radiçin, Mile Saviçin, Mile Blagojeviçin, Ljubisa Pejiçin, Branko Pejiçin dhe Verica Radoviçin, të cilët akuzohen për kryerjen e krimeve kundër njerëzimit kundër të burgosurve civilë boshnjakë në qershor 1992 gjatë luftës në Bosnje.

Sipas aktakuzës, nga 1 deri më 5 qershor 1992, rreth 400 burra boshnjakë u burgosën ilegalisht në Shkollën Teknike në qytetin e Karakaj, afër Zvornikut, pasi ishin marrë nga fshati Bijeli Potok.

“Menjëherë, ditën e parë, 20 persona vdiqën nga mbytja dhe vapa, sepse ishin mbyllur në një dhomë të vogël”, tha prokurori Mersudin Pruzhan në fjalën e tij hyrëse në gjykatë.

Në aktakuzë thuhet se Ivan Arapoviç, Milan Arapoviç, Kosta Pejiç, Branko Pejiç, Ljubisa Pejiç, Radiç, Saviç, Mile Blagojeviç dhe Vasiljeviçi ishin roje në Shkollën Teknike dhe morën pjesë në ndalimin e paligjshëm dhe trajtimin çnjerëzor të civilëve. Ata akuzohen se rrahën dhe keqtrajtuan të ndaluarit.

“Edhe pse ishin të detyruar të mbronin jetën e civilëve, ata nuk e bënë këtë”, tha Pruzhan.

Sipas aktakuzës, rojat nuk i penguan ushtarët e tjerë të hynin në ambiente dhe të rrihnin të burgosurit. Ata gjithashtu nuk i penguan ushtarët e tjerë që të largonin të burgosurit nga Shkolla Teknike dhe të shkonin në shtëpitë e tyre për të vjedhur sendet e tyre me vlerë dhe armët, pas së cilës shumë prej tyre u zhdukën pa gjurmë.

“Nga data 1 deri më 5 qershor, më shumë se 150 civilë u nxorën nga vendi i paraburgimit dhe humbën çdo gjurmë ose u vranë”, thuhet në aktakuzë.

Të gjithë të akuzuarit, përveç Verica Radoviçit dhe Vidoje Blagojeviçt, ishin anëtarë të Togës Karakaj të forcës së Mbrojtjes Territoriale në Zvornik, dhe më vonë të Brigadës së Zvornikut të Ushtrisë Serbe të Bosnjës.

Vidoje Blagojeviçi u akuzua si komandant i Brigadës së Zvornikut. Aktakuza pretendon se ai nuk mori masat e nevojshme dhe të arsyeshme si oficer epror për të parandaluar ndalimin e paligjshëm, trajtimin çnjerëzor, zhdukjet me forcë dhe vrasjet e civilëve boshnjakë të ndaluar, apo për të ndëshkuar autorët.

Blagojeviçi ishte dënuar më parë nga Gjykata Penale Ndërkombëtare për ish-Jugosllavinë me 18 vjet burg për krimet e kryera gjatë gjenocidit të Srebrenicës në korrik 1995. Ai u lirua në vitin 2015.

Verica Radoviçi akuzohet për vrasjen e dy të burgosurve më 1 qershor 1992 duke përdorur një armë që i ishte dhënë nga një roje. Dyshohet se ajo i vrau për hakmarrje, sepse burri i saj u vra në prill të atij viti.

Deri më tani në varrezën masive të Crni Vrh janë gjetur dhe identifikuar rreth 420 viktima të marra nga Bijeli Potoku. Kërkimi për 240 viktima të tjera është ende në vazhdim.

Një tjetër ish-ushtar, Stevo Vasiljeviç, u akuzua gjithashtu në aktakuzën fillestare, por procedurat kundër tij u ndanë më pas nga rasti kundër të tjerëve./balkaninsight.com/