BE dhe SHBA me dy rezoluta për Ukrainën në OKB: Maqedonia e Veriut në anën e Uashingtonit

Në ditën kur shënohet trevjetori i agresionit rus në Ukrainë, në OKB janë propozuar dy rezoluta të ndryshme. E para, e udhëhequr nga Shtetet e Bashkuara dhe e kosponsorizuar nga Maqedonia e Veriut, Izraeli, Gjeorgjia dhe Hungaria, kërkon përfundimin e shpejtë të luftës. E dyta, e paraqitur nga Gjermania dhe Franca në emër të Bashkimit Evropian, i referohet drejtpërdrejt “pushtimit të plotë të Ukrainës nga Federata Ruse” dhe kërkon tërheqjen e pakushtëzuar të trupave të Moskës.

Kryeministri i Maqedonisë së Veriut, Hristijan Mickoski, nuk dha shumë detaje se pse u radhit me SHBA-të në këtë garë rezolutash. “Kështu vendosëm”, deklaroi ai, duke mos dhënë shumë detaje. Ai shprehu pritshmërinë se rezoluta do të sigurojë mbështetjen e shumicës në Kombet e Bashkuara.

Shtetet e Bashkuara, në një notë diplomatike, e përshkruajnë rezolutën e tyre si një përpjekje që shikon drejt të ardhmes, me një synim të qartë: përfundimin e luftës.

Sekretari amerikan i Shtetit, Marco Rubio, e quajti rezolutën “të thjeshtë dhe historike”, duke theksuar se miratimi i saj do të hapte rrugën drejt paqes dhe sigurisë ndërkombëtare. SHBA-të gjithashtu kërkuan që shtetet anëtare të kundërshtojnë çdo amendament ose tekst rival.
Në tekstin e propozuar nga SHBA-të, shprehet keqardhje për humbjet tragjike të jetëve në konfliktin ruso-ukrainas dhe theksohet nevoja për një zgjidhje të qëndrueshme paqësore.

Megjithatë, rezoluta nuk përfshin referenca për sovranitetin dhe integritetin territorial të Ukrainës, çështje të cilat kanë qenë thelbësore në rezolutat e mëparshme të OKB-së.

Në anën tjetër, rezoluta e BE-së, e udhëhequr nga Franca dhe Gjermania, mban një ton më të drejtpërdrejtë. Ajo kërkon tërheqjen e menjëhershme dhe të pakushtëzuar të forcave ruse dhe përshkruan konfliktin si “pushtimi i plotë i Ukrainës nga Federata Ruse”. Kjo qasje reflekton qëndrimin e BE-së për një mbrojtje të qartë të sovranitetit dhe integritetit territorial të Ukrainës, në përputhje me Kartën e OKB-së.

Këshilli i Sigurimit i OKB-së pritet të votojë për projekt-rezolutën amerikane, ku për miratim nevojiten të paktën nëntë vota pro dhe asnjë veto nga pesë anëtarët e përhershëm – SHBA-ja, Rusia, Kina, Britania dhe Franca. Rusia, e cila e ka cilësuar pushtimin e vitit 2022 si një “operacion special ushtarak për të denazifikuar Ukrainën”, ka propozuar amendamente që adresojnë “shkaqet rrënjësore” të luftës.

Britania dhe 24 shtete të tjera të BE-së kanë propozuar gjithashtu amendamente për të përfshirë referenca për sovranitetin dhe integritetin territorial të Ukrainës, si dhe për të kërkuar një paqe të drejtë, të qëndrueshme dhe gjithëpërfshirëse.
Iniciativa amerikane vjen në një moment kur ish-presidenti Donald Trump ka ndërmarrë një nismë për të ndërmjetësuar fundin e luftës, duke shkaktuar ndarje me presidentin ukrainas Volodymyr Zelenskiy dhe duke ngritur shqetësime në mesin e aleatëve evropianë se mund të përjashtohen nga bisedimet e paqes. /The Geopost/