Ambasada e SHBA-së në Sarajevë i reagon Dodikut: Ndarja e Republikës Sërpska nga Bosnja nënkupton fundin e saj

Ambasada e Shteteve të Bashkuara të Amerikës në Sarajevë ka thënë se ndarja e Republikës Sërpska nga Bosnja e Hercegovina nënkupton “fundi i saj”.

Këto komente të ambasadës erdhën pasi qeveria e RS-së tha se në 30 ditët e ardhshme ajo do të krijojë një marrëveshje që do t’i dërgohet entitetit tjetër të Bosnjës, Federatës së Bosnjës e Hercegovinës, për “ndarje paqësore”.

“Dje, z. Dodik njoftoi se qeveria e Republika Srpska mori një vendim zyrtar për të propozuar “shkëputjen” e RS nga Bosnja dhe Hercegovina. Kjo është shkëputje e RS me një emër tjetër, dhe është e rrezikshme, e papërgjegjshme, kundër Dejtonit dhe vë në rrezik integritetin territorial, sovranitetin dhe karakterin multietnik të BiH. Këto janë interesat thelbësore të SHBA-së. Shtetet e Bashkuara do t’i mbrojnë dhe mbrojnë ato, ndër të tjera, duke i mbajtur ata që i vënë në rrezik përgjegjës për veprimet e tyre”, ka thënë ambasada amerikane.

“Z. Dodik dhe qeveria e RS janë përpjekur të justifikojnë këtë vendim bazuar në një sërë gënjeshtrash dhe dezinformatash të krijuara për të frikësuar publikun e RS për t’i ndjekur ata në këtë rrugë të rrezikshme. Faktet janë të thjeshta dhe të drejtpërdrejta. Nuk ka asnjë konspiracion ndërkombëtar për të shfuqizuar RS dhe zoti Dodik nuk mund të tregojë një deklaratë të vetme të një zyrtari amerikan që bën thirrje për shfuqizimin e RS. BiH nuk është një bashkim i dy entiteteve. Siç thuhet në Marrëveshjen e Paqes të Dejtonit dhe Kushtetutën e BiH, BiH është shteti pasardhës i Republikës së Bosnjë dhe Hercegovinës. Kushtetuta e BiH nuk u siguron entiteteve apo ndonjë njësie tjetër nënshtetërore të drejtën e shkëputjes ose të “ndarjes”. RS mund të ekzistojë vetëm brenda BiH. Shkëputja ose “ndarja” e RS nuk do të thotë pavarësi e RS ose fundi i BiH, do të thotë fundi i RS. Veprimet e zotit Dodik vënë në rrezik një të ardhme brenda institucioneve euroatlantike që populli i BiH-së, përfshirë RS-në, e dëshiron. Rruga e tij e propozuar do të siguronte që banorët e RS, fëmijët dhe nipërit e tyre të mos kenë jetën paqësore, të begatë dhe demokratike që meritojnë”, ka përfunduar Ambasada e SHBA-së.

Kryeministri i RS-së, Radovan Vishkoviq, tha pas mbledhjes se “kjo nuk është shkëputje, ndarja paqësore nuk është shkëputje. Ne do ta ofrojmë atë, nëse na konsideroni komb gjenocidal, e që nuk jemi, atëherë nuk kemi pse të jetojmë së bashku”. Dodik mori pjesë në mbledhje, gjithashtu.

Qeveria e RS-së e bëri këtë propozim gjatë një mbledhjeje të mbajtur në prag të seancës së Asamblesë së Përgjithshme të Kombeve të Bashkuara (OKB), ku u miratua rezoluta që e shpall 11 Korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Qe një kohë të gjatë nacionalisti Dodik kërcënon me ndarjen e Republikës Sërpska nga Bosnja e Hercegovina duke tentuar që ta shfuqizojë Marrëveshjen e Dejtonit që solli paqen në Bosnjë pas luftës gjenocidale.

Në vitin 2022 Thesari i SHBA-së sanksionoi liderin serb të Bosnjës Milorad për përfshirje në aktivitete destabilizuese dhe korruptive që kërcënojnë të copëtojnë Bosnje-Hercegovinën.

/TheGeopost/