Alarm për dron në Lituani, NATO ngrit avionët luftarakë – objekti rezulton të jetë tufë zogjsh

Një alarm për një dron të dyshuar mbi Lituani ka vënë në lëvizje NATO-n, duke detyruar autoritetet të mbyllin përkohësisht aeroportin e Vilniusit dhe Aleancën të ngrejë të paktën një avion luftarak.

Megjithatë, ajo që fillimisht u identifikua në radar si një dron i mundshëm, pas verifikimit nga ajri rezultoi të ishte një tufë zogjsh, raportoi Reuters.

Qendra Kombëtare për Menaxhimin e Krizave e Lituanisë bëri të ditur se alarmi ajror u anulua dhe aeroporti u rihap pas tridhjetë e tetë minutash.

“Në leximet fillestare të radarit, gjurmët e lëna nga zogjtë dhe dronët mund të jenë të ngjashme”, sqaroi Qendra.

Për verifikimin e objektit ishte aktivizuar një avion luftarak nga Šiauliai, në veri të Lituanisë. Në këtë zonë janë të vendosura aktualisht forcat ajrore italiane, si pjesë e misionit të NATO-s për mbrojtjen ajrore të Baltikut.

Edhe pse alarmi rezultoi i rremë, reagimi i shpejtë pasqyron nivelin e lartë të gatishmërisë në krahun lindor të NATO-s, në një kohë kur incidentet me dronë kanë shtuar shqetësimet e sigurisë në rajon.

Reuters raporton se dronë ushtarakë kanë hyrë në hapësirat ajrore të Finlandës, Estonisë, Letonisë dhe Lituanisë, duke nxitur shqetësime se pasojat e luftës në Ukrainë mund të shtrihen drejt kufijve veriorë të NATO-s me Rusinë.

Pavarësisht alarmit në kryeqytetin lituanez, Maratona e Vilniusit, e cila po zhvillohej në atë kohë, nuk u ndërpre./TheGeopost