Politico: Shefi i CIA-s shkoi në Moskë për të paralajmëruar Kremlinin kundër sulmeve ndaj vendeve të NATO-s

Drejtori i Agjencisë Qendrore të Inteligjencës së SHBA-së (CIA), John Ratcliffe, ka zhvilluar një vizitë në Moskë për t’u përcjellë autoriteteve ruse një paralajmërim të drejtpërdrejtë kundër çdo sulmi ose përshkallëzimi ndaj vendeve të NATO-s, me vëmendje të veçantë ndaj Estonisë, Letonisë dhe Lituanisë.

Vizita e Ratcliffe në kryeqytetin rus më 25 gusht nuk ishte paralajmëruar publikisht. Sipas raportimeve të The Wall Street Journal, kreu i CIA-s u dërgua në Moskë për të paralajmëruar Rusinë kundër një sulmi ndaj vendeve të NATO-s, mes shqetësimeve të reja të inteligjencës amerikane se Kremlini mund të tentojë të testojë vendosmërinë e Aleancës.

Politico, duke cituar burime të njohura me përmbajtjen e bisedimeve, raportoi se paralajmërimi i Ratcliffe ishte përqendruar veçanërisht te tri shtetet baltike – Estonia, Letonia dhe Lituania.

“Takimi kishte për qëllim kryesisht të paralajmëronte Rusinë kundër çdo veprimi përshkallëzues ndaj shteteve baltike”, tha një burim i njohur me çështjen, sipas raportimeve të publikuara nga media që cituan Politico.

Sipas të njëjtave raportime, drejtori i CIA-s e ka shfrytëzuar vizitën edhe për t’i kërkuar Moskës të zvogëlojë mbështetjen ushtarake dhe ekonomike për Iranin.

Një burim i njohur me vizitën dhe një zyrtar britanik thanë se Ratcliffe u kishte bërë thirrje autoriteteve ruse të kufizonin mbështetjen për Teheranin, në një kohë kur marrëdhëniet mes Moskës dhe Iranit janë bërë një shqetësim i rëndësishëm për Uashingtonin dhe aleatët e tij.

Ratcliffe mbërriti në Moskë më 25 gusht me një avion transportues ushtarak Boeing C-17 të Forcave Ajrore të SHBA-së, i cili u ul në aeroportin Vnukovo. Sipas të dhënave të raportuara publikisht për fluturimin, avioni kishte ardhur nga Riga, ndërsa u largua nga Moska më vonë gjatë mbrëmjes.

Vizita shënon udhëtimin e parë të njohur të një drejtori të CIA-s në Moskë që nga viti 2021, kur paraardhësi i Ratcliffe, William Burns, kishte udhëtuar në Rusi mes shqetësimeve për një pushtim të mundshëm të Ukrainës.

Kremlini konfirmoi më pas se Ratcliffe kishte zhvilluar kontakte me homologët e tij nga shërbimet ruse të inteligjencës, por deklaroi se një takim me presidentin rus Vladimir Putin nuk ishte planifikuar.

Presidenti amerikan Donald Trump e ka përshkruar udhëtimin e Ratcliffe si një mision “gjysmë rutinë”, duke hedhur poshtë pretendimet se drejtori i CIA-s ishte dërguar posaçërisht në Moskë për shkak të një plani të Putinit për të testuar vendosmërinë e NATO-s.

Trump tha se SHBA-ja po punon për t’i dhënë fund luftës në Ukrainë dhe la të kuptohet se vizita mund të lidhej me këto përpjekje.

Vizita e kreut të CIA-s vjen në një moment të tensioneve të shtuara në Evropë.

The Wall Street Journal ka raportuar më herët, duke iu referuar vlerësimeve të inteligjencës amerikane, se ekziston shqetësimi se Putini mund të përpiqet të testojë vendosmërinë e NATO-s përmes një sulmi të kufizuar ose veprimeve hibride kundër një vendi anëtar të Aleancës, veçanërisht në rajonin baltik. Një veprim i tillë mund të synonte të vinte në provë nenin 5 të NATO-s dhe unitetin e Aleancës.

Sipas parimit të mbrojtjes kolektive të NATO-s, një sulm i armatosur kundër një vendi anëtar konsiderohet sulm kundër të gjithë aleatëve.