Rusia po rekruton kriminelë për sabotazhe në Evropë, fabrikat e mbrojtjes në shënjestër

Rusia po intensifikon luftën hibride kundër Evropës, ndërsa objektet e industrisë së mbrojtjes dhe bizneset që lidhen me prodhimin ushtarak po shfaqen gjithnjë e më shumë si objektiva të dyshuara të operacioneve të sabotimit të lidhura me Kremlinin.

Mediat perëndimore, duke iu referuar të dhënave të inteligjencës, raportojnë se shërbimet ruse të sigurisë po përdorin persona nga rrjetet kriminale për të kryer sulme dhe akte sabotimi në Evropë, duke shmangur përfshirjen e drejtpërdrejtë të operativëve të tyre.

Një nga incidentet më të fundit është regjistruar në Sllovaki, ku autoritetet ndërhynë për të parandaluar një përpjekje për zjarrvënie në një fabrikë të prodhimit të dronëve të kompanisë ukrainase Skyeton, në qytetin e Preshovit.

Policia arrestoi të dyshuarit, ndërsa hetimet po vazhdojnë për të përcaktuar motivin dhe nëse incidenti ishte pjesë e një operacioni më të gjerë të sabotimit të lidhur me Rusinë.

Rasti në Sllovaki vjen në një kohë kur autoritetet evropiane po hetojnë një seri incidentesh të dyshimta në objekte të lidhura me industrinë e mbrojtjes.

Në Estoni, autoritetet kanë hetuar dyshimet për përfshirjen ruse në një zjarr në objektet e Milrem Robotics, kompani e specializuar në robotikën ushtarake. Ndërkohë, janë raportuar edhe incidente të tjera, përfshirë një shpërthim në një fabrikë municionesh pranë Romës dhe një zjarr në një objekt të industrisë ushtarake në Bullgari.

Megjithatë, jo të gjitha këto raste janë provuar publikisht se kanë lidhje me Rusinë. Hetimet në secilin rast duhet të përcaktojnë nëse bëhet fjalë për sabotim të koordinuar, aksidente apo shkaqe të tjera.

Njësia 29155, në qendër të dyshimeve

Në fokus të autoriteteve perëndimore prej vitesh është Njësia 29155 e GRU-së, njësia e inteligjencës ushtarake ruse e lidhur me operacione klandestine jashtë vendit.

Njësia është akuzuar nga qeveritë perëndimore për përfshirje në një seri operacionesh të fshehta, përfshirë sabotime, shpërthime në depo municionesh dhe përpjekje për vrasje.

Një nga rastet më të njohura lidhet me shpërthimet në depot e municioneve në Vrbětice të Çekisë, në vitin 2014. Autoritetet çeke më vonë akuzuan operativë të GRU-së për përfshirjen në këtë operacion.

Shtetet perëndimore kanë paralajmëruar gjithashtu për një ndryshim të mënyrës së operimit të rrjeteve ruse. Në vend që operativët rusë të kryejnë drejtpërdrejt sabotazhet, agjencitë e inteligjencës kanë ngritur dyshime se Moska po përdor persona të rekrutuar online, shpesh nga qarqe kriminale, për të realizuar detyra të caktuara.

Kjo metodë i ofron Kremlinit një nivel të mohueshmërisë së besueshme, duke e bërë më të vështirë lidhjen e drejtpërdrejtë të sulmit me shtetin rus.

Lufta hibride zhvendoset në territorin evropian

Sulmet ndaj industrisë së mbrojtjes kanë marrë rëndësi të veçantë pas pushtimit të plotë të Ukrainës nga Rusia. Fabrikat që prodhojnë dronë, municione, pajisje ushtarake apo teknologji që përdoret nga Ukraina konsiderohen objektiva me vlerë strategjike.

Për Moskën, sabotimi i këtyre objekteve mund të shkaktojë dëme materiale, të ndërpresë prodhimin dhe, mbi të gjitha, të krijojë pasiguri në vendet evropiane që mbështesin Ukrainën.

Për këtë arsye, shërbimet evropiane të sigurisë po e trajtojnë sabotimin si një nga komponentët kryesorë të luftës hibride ruse.

Në përgjigje të kërcënimit, vendet perëndimore kanë rritur mbrojtjen e infrastrukturës kritike, kanë forcuar shkëmbimin e informacionit mes shërbimeve të inteligjencës dhe kanë shtuar masat e sigurisë në objektet e industrisë së mbrojtjes.

Në këtë panoramë, incidenti në fabrikën e dronëve në Prshov shihet si një tjetër sinjal se fronti i luftës hibride ruse nuk kufizohet më në hapësirën kibernetike dhe propagandistike, por shtrihet gjithnjë e më shumë në territorin fizik të Evropës.

The GeoPost