SHBA ofron deri në 10 milionë dollarë shpërblim për informacion mbi pesë zyrtarët e lartë iranianë

Shtetet e Bashkuara kanë rinovuar ofertën e shpërblimeve financiare për informacion mbi pesë figura të larta të lidhura me Trupat e Gardës Revolucionare Islamike të Iranit (IRGC), me një shumë që mund të arrijë deri në 10 milionë dollarë.

Thirrja është bërë përmes programit “Shpërblime për Drejtësi” (Rewards for Justice) të Departamentit amerikan të Shtetit, i cili kërkon informacione që mund të ndihmojnë në identifikimin, lokalizimin ose dokumentimin e aktiviteteve të individëve të përfshirë në listë.

Sipas autoriteteve amerikane, pesë zyrtarët dyshohet se kanë pasur rol në planifikimin, organizimin ose kryerjen e aktiviteteve terroriste në vende të ndryshme të botës.

Në listën e Departamentit të Shtetit janë:

Ahmed Vahidi, komandant i IRGC-së;

Ali Abdullahi, shef i Shtabit Qendror të Khatemolanbia;

Saeed Aghajani, komandant i njësive të mjeteve ajrore pa pilot të Forcave Hapësinore të IRGC-së;

Hamidreza Lasgarian, drejtues i Drejtorisë së Luftës Kibernetike dhe Elektronike;

Majid Khademi, komandant i Shërbimit të Inteligjencës.

Autoritetet amerikane kanë bërë të ditur se informacioni i kërkuar duhet të ketë vlerë konkrete për përcaktimin e identitetit, vendndodhjes ose aktiviteteve të këtyre individëve.

Personat që ofrojnë informacione të konsideruara të dobishme mund të kualifikohen për shpërblim financiar, si dhe për ndihmë në zhvendosje, në përputhje me rregullat e programit amerikan.

Rinovimi i ofertës vjen në një periudhë tensionesh të vazhdueshme mes Uashingtonit dhe Teheranit dhe nënvizon përpjekjet e Shteteve të Bashkuara për të goditur individët dhe strukturat e lidhura me IRGC-në.

Uashingtoni e akuzon Gardën Revolucionare Islamike për mbështetjen e aktiviteteve terroriste dhe për zhvillimin e operacioneve jashtë territorit të Iranit.

Programi “Shpërblime për Drejtësi” është një nga mekanizmat e përdorur nga Departamenti amerikan i Shtetit për të mbledhur informacione mbi persona dhe organizata që, sipas autoriteteve amerikane, paraqesin kërcënim për sigurinë e Shteteve të Bashkuara.

The GeoPost