Kosova dhe SHBA diskutojnë forcimin e aleancës strategjike dhe rrugën drejt NATO-s

Presidentja e Kosovës, Vjosa Osmani, është takuar në Uashington me kryediplomatin amerikan, Marco Rubio, në Departamenti amerikan i Shtetit.

Osmani bëri të ditur se me sekretarin amerikan të Shtetit ka diskutuar për mundësitë e forcimit të aleancës ndërmjet Kosovës dhe Shteteve të Bashkuara, si dhe për hapat konkretë që, sipas saj, kanë rëndësi jetike për qytetarët e Kosovës.

Ajo theksoi se e ka falënderuar Rubion për përfshirjen e Kosovës në Bordin e Paqes, për mbështetjen e vazhdueshme amerikane për sovranitetin dhe integritetin territorial të Kosovës, si dhe për praninë ushtarake amerikane në vend, të cilën e cilësoi si kyçe për paqen dhe stabilitetin rajonal.

Në fokus të bisedës ishte edhe rëndësia e anëtarësimit të Kosovës në NATO, si dhe hapja e kapitujve të rinj të bashkëpunimit në fushat e ekonomisë dhe mbrojtjes, në kuadër të partneritetit strategjik mes dy vendeve.

Takimi në DASH u zhvillua në përvjetorin e 18-të të vendosjes së marrëdhënieve diplomatike mes Kosovës dhe SHBA-së.

Kosova shpalli pavarësinë më 17 shkurt 2008 dhe Shtetet e Bashkuara ishin ndër vendet e para që e njohën shtetin e ri. Prishtina e konsideron aleancën me Uashingtonin si themelore për shtetndërtimin dhe sigurinë e vendit.

SHBA-ja vazhdon të luajë rol të rëndësishëm në sigurinë e Kosovës përmes pranisë së rreth 600 trupave paqeruajtëse në kuadër të misionit të NATO-s në Kosovë, KFOR.

Sipas një njoftimi të Presidencës së Kosovës, kjo prani ka rëndësi strategjike për stabilitetin e vendit dhe rajonit.

Një ditë para takimit Osmani–Rubio, Pentagoni i tha Radios Evropa e Lirë se nuk ka ndryshime në dislokimin e forcave amerikane në Kosovë, pas raportimeve se SHBA-ja po kërkon nga NATO-ja reduktimin e disa angazhimeve të jashtme, përfshirë misionin e KFOR-it.

Presidentja Osmani e cilësoi procesin e anëtarësimit të Kosovës në NATO si jetik për stabilitetin rajonal dhe kërkoi avancimin e bashkëpunimit në fushën e mbrojtjes.

Ajo përmendi se Kosova, e cila është në proces të shndërrimit të Forcës së Sigurisë në ushtri, ka intensifikuar vitet e fundit blerjet në fushën e mbrojtjes. Armatimet e fundit janë siguruar kryesisht nga SHBA-ja, Turqia, Gjermania dhe vende të tjera anëtare të NATO-s.

Në takimin në DASH, Osmani dhe Rubio diskutuan edhe për Dialogun Strategjik dypalësh.

Presidentja e Kosovës theksoi rëndësinë e avancimit të këtij dialogu si mekanizëm për koordinimin e prioriteteve të përbashkëta dhe për hapjen e kapitujve të rinj të bashkëpunimit në fusha të ndryshme.

Osmani po qëndron në SHBA prej dy ditësh. Më 19 shkurt, ajo mori pjesë në takimin inaugurues të Bordit të Paqes, një nismë e presidentit amerikan Donald Trump për dhënien fund të konflikteve në botë.

Kosova është anëtare themeluese e këtij bordi, i cili parashihet në planin 20-pikësh të Trumpit për paqe në Gazë, dhe ka shprehur gatishmërinë për të kontribuar me trupa ushtarake në kuadër të kësaj nisme.

The Geopost