“Mos i besoni asaj që shihni”, eksperti i AI: Inteligjenca artificiale po e mjegullon kufirin mes realitetit dhe propagandës

Roli i inteligjencës artificiale në krijimin dhe përhapjen e narrativave propagandistike dhe lajmeve të rreme po bëhet gjithnjë e më shqetësues, u tha në episodin e radhës të emisionit The Geo Talks, ku i ftuar ishte eksperti i inteligjencës artificiale Çelik Nimani.

Në diskutim u theksua se, ndonëse propaganda ka ekzistuar që nga fillimet e medias, zhvillimi i shpejtë i teknologjive të reja, veçanërisht i AI-së dhe algoritmeve të avancuara, ka krijuar një realitet të ri ku manipulimi i informacionit është bërë shumë më i sofistikuar dhe më i vështirë për t’u identifikuar.

Sipas Nimanit, inteligjenca artificiale është krijuar fillimisht për të ndihmuar njerëzit në punë, kërkime shkencore dhe zhvillim ekonomik, por si çdo teknologji e re, ajo mbart edhe rrezikun e keqpërdorimit.

“Sot, me një komandë të thjeshtë tekstuale, mund të krijohen video, imazhe apo përmbajtje tërësisht të rreme, por jashtëzakonisht bindëse,” tha ai.

Ai veçoi si shembull modelet më të reja të gjenerimit të videove, përfshirë SEE-Dance, produkt i kompanisë ByteDance, e njohur si kompania prapa TikTok. Sipas tij, këto mjete e kanë bërë pothuajse të pamundur dallimin mes videos reale dhe asaj të krijuar nga inteligjenca artificiale.

Në emision u shfaqën edhe shembuj konkretë, përfshirë video ku figura publike si Donald Trump paraqiten në skena filmike që nuk kanë ndodhur kurrë, të realizuara duke përdorur skena nga seriale si The Office. Nimani sqaroi se sot nuk është më e nevojshme të montohet fytyra e dikujt mbi trupin e një tjetri, siç ndodhte me deepfake-et e para disa viteve.

“Tani krijohet gjithçka nga e para: fytyra, zëri, emocioni dhe narrativa,” theksoi ai.

Eksperti paralajmëroi se këto teknologji mund të përdoren për të krijuar përmbajtje që nxit panik, përçarje apo destabilizim shoqëror, përfshirë edhe skenarë të rremë politikë ose gjeopolitikë. Ai solli shembuj nga fushatat zgjedhore dhe raste virale, ku video të gjeneruara nga AI janë marrë si të vërteta nga publiku.

Sa i përket mënyrave të identifikimit të përmbajtjes së rreme, Nimani theksoi se deri vonë ishte e mundur të vëreheshin detaje si toni robotik i zërit, gabime vizuale apo elemente joreale në sfond. Megjithatë, me modelet e reja, këto shenja po zhduken.

“Prandaj, sot më e rëndësishmja është burimi i informacionit,” tha ai, duke këshilluar qytetarët që të mbështeten në media dhe individë të verifikueshëm dhe të kontrollojnë informacionin nga disa burime përpara se ta besojnë.

Nimani theksoi gjithashtu nevojën urgjente për rritjen e edukimit mediatik, veçanërisht në Kosovë, duke propozuar që njohuritë bazë për median dhe teknologjinë të përfshihen që në arsimin fillor.

Ai kujtoi se mungesa e verifikimit të informacionit ka qenë e dukshme edhe gjatë pandemisë së COVID-19, kur shumë qytetarë besuan dezinformata pa kontrolluar burimet.

Në përfundim, u theksua se inteligjenca artificiale është një zhvillim historik, i krahasueshëm me Revolucionin Industrial, që po transformon ekonominë globale, median, industrinë dhe jetën e përditshme.

“AI do të vazhdojë të zhvillohet më shpejt se sa mund ta parashikojmë. Prandaj, skeptikë, të kujdesshëm dhe të informuar – kjo është qasja e vetme e sigurt,” përfundoi Nimani.

The Geopost