Gazetarët investigativë hungarezë: Zbulimi i eksplozivëve pranë një tubacioni gazi në Serbi – një operacion i inskenuar

Gazetarë investigativë në Hungari kanë ngritur dyshime se rasti i pretenduar i zbulimit të eksplozivëve pranë një tubacioni gazi në Serbi mund të jetë pjesë e një operacioni të inskenuar, me qëllime politike në prag të zgjedhjeve parlamentare në Hungari.

Sipas këtyre pretendimeve, operacioni i mundshëm do të lidhej me krijimin e një preteksti për vendosjen e gjendjes së jashtëzakonshme dhe ndikimin në rezultatin e zgjedhjeve të planifikuara për më 12 prill.

Gazetari investigativ Baláš Kaufman publikoi në rrjetin social X një mesazh që pretendon se e ka marrë më 25 shkurt nga një burim brenda qeverisë hungareze.

Në këtë mesazh përshkruhet një skenar i mundshëm, sipas të cilit një “sulm” ndaj interesave hungareze në Serbi do të përdorej për të justifikuar masa të jashtëzakonshme.

“Serbia. Serbët ose rusët do të nisin një ‘sulm’ ndaj interesave hungareze në tre javët e ardhshme… Qëllimi i Orbán-it është të vendosë një gjendje të jashtëzakonshme”, thuhet në mesazhin e publikuar nga Kaufman, i cili shton se ky version është konfirmuar nga disa burime.

Informacione të ngjashme janë bërë publike edhe nga gazetari Szabolcs Panyi, pjesë e redaksisë investigative Direkt36, i cili ka raportuar se edhe ai më herët kishte marrë sinjale të ngjashme nga qarqe pranë qeverisë hungareze.

Këto pretendime vijnë në një kohë kur presidenti i Serbisë, Aleksandar Vuçiq, deklaroi se pranë një tubacioni gazi që lidh Serbinë dhe Hungarinë janë gjetur mjete shpërthyese, duke ngritur alarmin për një kërcënim ndaj infrastrukturës kritike.

Nga ana tjetër, kryeministri hungarez, Viktor Orbán, nuk ka komentuar publikisht mbi akuzat për një operacion të mundshëm të inskenuar. Megjithatë, ai ka mbledhur Këshillin e Mbrojtjes, pas informacionit të marrë nga Vuçiçi lidhur me rastin e pretenduar.

The Geopost