Eurodeputeti austriak i ashpër ndaj Orbanit: “Historia më idiote” për shpërthimin pranë gazsjellësit

Eurodeputeti austriak Helmut Brandstätter reagoi ashpër ndaj njoftimeve të kryeministrit hungarez Viktor Orbán për një pajisje shpërthyese të gjetur pranë tubacionit të gazit që lidh Serbinë me Hungarinë.

Në rrjetin social X, a tha se  “Pra, nuk mund të kishit shpikur një histori më idiote.”

Brandstätter, ish-gazetar dhe redaktor i shërbimit publik austriak ORF dhe mediave të tjera të njohura, është anëtar i Parlamentit Evropian nga viti 2024 në kuadër të grupit Renew Europe dhe pjesë e Komitetit për Punë të Jashtme.

Reagimi i tij vjen në një kontekst ku gazetarë investigativë në Hungari kanë ngritur dyshime se rasti i pretenduar i zbulimit të eksplozivëve mund të jetë pjesë e një operacioni të inskenuar politik, në prag të zgjedhjeve parlamentare në Hungari më 12 prill.

Gazetari investigativ Baláš Kaufman publikoi një mesazh që thotë se e ka marrë më 25 shkurt nga një burim brenda qeverisë hungareze, ku përshkruhet një skenar sipas të cilit një “sulm” ndaj interesave hungareze në Serbi do të përdorej për të justifikuar masa të jashtëzakonshme.

“Serbia. Serbët ose rusët do të nisin një ‘sulm’ ndaj interesave hungareze në tre javët e ardhshme… Qëllimi i Orbán-it është të vendosë një gjendje të jashtëzakonshme”, thuhet në mesazhin e publikuar nga Kaufman.

Informacione të ngjashme ka bërë publike edhe gazetari Szabolcs Panyi nga redaksia investigative Direkt36.

Analizat tregojnë se bashkëpunimi midis Serbisë dhe Hungarisë përshtatet në strategjinë më të gjerë të Fidesz në Ballkan.

Në të njëjtën kohë, si Beogradi ashtu edhe Budapesti mbajnë marrëdhënie të ngushta me Moskën dhe Pekinin, gjë që shpesh i vë në konflikt me Brukselin. Është pikërisht ky orientim i politikës së jashtme që e forcon më tej aleancën e tyre.

Marrëdhëniet e Rusisë me Serbinë dhe Hungarinë janë të ndryshme në formë, por të lidhura nga një element i përbashkët: përdorimi i këtyre lidhjeve për të zgjeruar ndikimin rus në Evropë dhe për të sfiduar linjën e Perëndimit.

E lidhur me këtë, qëllimi i Rusisë është mbajtja e Orbanit në pushtet, sa më shumë.

The Geopost