Vuçiq takohet me presidentin e Iranit dhe ministrin kinez, flet për bashkëpunim dhe propagandon për situatën në Kosovë

Presidenti i Serbisë, Aleksandar Vuçiq, ka takuar aleatët e tij në Nju Jork gjatë seancës së Asamblesë së 79-të të Përgjithshme të OKB-së ku po marrin pjesë qindra liderë botërorë.

Ai është takuar me presidentin e Iranit, Massoud Pezeshkiyan, për të cilin shkroi: “Një takim i përzemërt me Presidentin Pezeškian dhe një bisedë kuptimplotë për aspektet më të rëndësishme të bashkëpunimit ndërmjet Serbisë dhe Iranit, si dhe për mundësitë gjeopolitike globale”.

Vuçiq shtoi se me të kanë shkëmbyer edhe mendimet për vendet e tyre duke përmendur edhe lidhjet ekonomike.

Tutje Vuçiq ka përhapur propagandën që ka krijuar si narracion për “situatën e serbëve në Kosovë” se gjoja po persekutohen.

“Temë e veçantë e bisedës ishte gjendja e rëndë e popullit serb në Kosovë dhe bashkëbiseduesin e respektuar e informova në detaje për të gjitha sfidat në rrugën e zgjidhjes së shumë çështjeve të hapura dhe serioze në këtë drejtim. Edhe një herë falënderova Iranin për qëndrimin e tij konsistent dhe të palëkundur në lidhje me integritetin territorial dhe sovranitetin e Serbisë dhe theksova se vendi ynë e vlerëson një qëndrim të tillë, i cili i reziston presioneve të shumta, por flet edhe për marrëdhëniet miqësore mes popujve tanë”, ka shkruar Vuçiq në Instagram.

Ai tha se këtë rast e ka shfrytëzuar për ta ftuar Pezeškian të vizitojë Serbinë, për të diskutuar potencialin e bashkëpunimit në shumë fusha dhe për forcimin e marrëdhënieve mes tyre.

Vuçiq nuk e ka lëshuar rastin pa u takuar edhe me Ministrin e Punëve të Jashtme e Kinës, Wang Yi, me të cilin ka diskutuar marrëdhëniet mes Serbisë dhe Kinës dhe për “bashkëpunimin e mëtejshëm në fusha me rëndësi reciproke, te çështjet globale”.

Ai ka falënderuar Kinën që nuk ka votuar për Rezolutën e Srebrenicës e cila njohu gjenocidin serb në Srebrenicë.

“Theksova se Serbia është mirënjohëse ndaj Kinës, e cila votoi kundër rezolutës për Srebrenicën në Asamblenë e Përgjithshme të Kombeve të Bashkuara dhe i kërkova ministrit t’i përcjellë Presidentit Xi Jinping përshëndetjet e mia dhe mirënjohjen tonë për mbështetjen e vazhdueshme dhe miqësinë e tij të sinqertë”, ka thënë Vuçiq.

Presidenti serb edhe në këtë takim ka folur mbi “gjendjen e rëndë të serbëve në Kosovë”.

“I paraqita atij situatën gjithnjë e më të vështirë për popullin serb në Kosovë dhe kërkova mbështetjen e Kinës në luftën për të vërtetën dhe respektimin e ligjit ndërkombëtar”, ka shkruar Vuçiq./The Geopost/