Fushata e re mobilizuese e Ukrainës përballë përparimeve ruse

Ukraina planifikon të tërheqë 160,000 ushtarë shtesë në ushtrinë e saj ndërsa Rusia fiton terren në lindje të vendit.

Rusia po bën sulme në rajonin lindor të Donetskut, duke thënë të martën se kishte pushtuar plotësisht qytetin minerar Selydove.

Gjithashtu u raportua se një numër i trupave të Koresë së Veriut ishin transferuar në Rusi.

Ushtria ukrainase ka qenë nën presion të madh kohët e fundit, pjesërisht për shkak se Rusia ka më shumë personel dhe burime më të mëdha.

“Është planifikuar të thirren më shumë se 160,000 ushtarë”, tha të martën në parlament Sekretari i Këshillit të Sigurisë Kombëtare të Ukrainës Oleksandr Lytvynenko.

Agjencia e lajmeve AFP raporton se rekrutimi do të zgjasë tre muaj.

Njoftimi vjen pasi Ukraina vazhdon të sigurojë personel për ofensivën e saj në rajonin Kursk të Rusisë që filloi në gusht.

Pentagoni vlerëson se rreth 10,000 trupa të Koresë së Veriut janë dërguar në lindje të Rusisë për stërvitje.

Shtetet e Bashkuara thanë të martën se një “numër i vogël” trupash të Koresë së Veriut ishin vendosur në Kursk. Disa mijëra të tjerë janë rrugës për atje.

Koreja e Jugut ka pretenduar se trupat po trajnohen në vende të ndryshme, ku shumë prej tyre kanë veshur uniforma ruse për t’u kamufluar.

Një zyrtar i lartë i qeverisë tha se besohej se deri në 11,000 trupa ishin dërguar tashmë në Rusi, duke përfshirë të paktën 3,000 në perëndim të vendit.

Javën e kaluar, presidenti Vladimir Putin refuzoi të mohonte se trupat e Koresë së Veriut kishin mbërritur në Rusi, pasi dolën raporte se Pheniani po përgatitej të dërgonte mijëra trupa për të mbështetur aleatin e tij.

Mobilizimi i fundit erdhi pasi parlamenti i Ukrainës miratoi një ligj në prill që mbështet mobilizimin e trupave për të luftuar forcat pushtuese ruse.

Ligji kërkon që çdo burrë nga mosha 25 deri në 60 vjeç të regjistrojë të dhënat e tij në një bazë të dhënash elektronike në mënyrë që të jetë i kualifikuar për rekrutim. Oficerët e draftit janë në kërkim të atyre që i shmangen regjistrit, duke bërë që më shumë burra që nuk duan të shërbejnë të fshihen.

Masa synon të rrisë numrin e rekrutëve, i cili është nën presion të madh mes përparimeve të mëtejshme ruse në lindje.

Moska ka njoftuar se tani kontrollon të gjithë Selydove në rajonin e Donetskut si dhe fshatrat përreth, duke u fokusuar në qytetin e Pokrovsk.

Ky është një qendër transporti me rëndësi strategjike vetëm 18 km larg./BBC/