Shaheen: Rusia po intensifikon luftën hibride, SHBA-ja duhet të godasë burimet e financimit të Kremlinit

Senatorja amerikane Jeanne Shaheen ka paralajmëruar se përballja me Rusinë nuk kufizohet më vetëm në luftën në Ukrainë, duke e lidhur Moskën me një varg aktivitetesh hibride, presionin ekonomik, sabotimet dhe përpjekjet për të testuar NATO-n në krahun lindor të Evropës.

Në një intervistë për Radion Evropa e Lirë më 17 shtator, Shaheen tha se Rusia po intensifikon luftën hibride dhe se Shtetet e Bashkuara dhe aleatët e tyre duhet të jenë në gjendje t’u përgjigjen këtyre veprimeve përtej fushëbetejës ukrainase.

Në të njëjtën kohë, ajo e konsideroi projektligjin e ri të sanksioneve si një instrument për të goditur një prej burimeve kryesore të fuqisë së Kremlinit – të ardhurat nga nafta dhe gazi.

Sipas Shaheen, masat synojnë sektorin financiar rus, oligarkët dhe personat pranë Vladimir Putinit, por edhe vendet që vazhdojnë të blejnë energji ruse. Ajo veçoi Kinën dhe Indinë si blerës të mëdhenj dhe tha se mesazhi i Uashingtonit është se financimi i luftës ruse duhet të ketë një kosto.

Por, për Shaheen, presioni ndaj Moskës nuk është vetëm ekonomik.

Ajo tha se Rusia po përdor gjithnjë e më shumë mjete hibride – nga dronët dhe sulmet kibernetike te sabotimet – dhe se aktiviteti rus po testohet edhe në Baltik dhe në Poloni.

Senatorja amerikane e lidhi këtë me një sfidë më të gjerë ndaj sigurisë së NATO-s.

Në këtë kuadër, Shaheen përmendi edhe Ballkanin, duke shprehur shqetësim për lidhjet e Serbisë dhe të serbëve në Republikën Sërpska me Rusinë dhe për atë që ajo e konsideron interes të Moskës për destabilizimin e rajonit.

Në fund, senatorja amerikane e vendosi Rusinë në një rrafsh edhe më të gjerë, duke thënë se Moska po bashkëpunon me Kinën, Iranin dhe Korenë e Veriut. Për të, këto zhvillime nuk janë kriza të izoluara, por pjesë të ndërlidhura të një sfide ndaj sigurisë evropiane dhe amerikane.

The GeoPost