Kryeministri britanik: Do ta vazhdojmë ndihmën për Ukrainën pavarësisht kërcënimeve nga Rusia

Kryeministri britanik, Andy Burnham, ka krahasuar rezistencën e Ukrainës kundër pushtimit rus me luftën e Britanisë së Madhe kundër Gjermanisë naziste, duke theksuar se Londra do të vazhdojë mbështetjen për Kievin dhe do të ndihmojë në forcimin e mbrojtjes ajrore të vendit para ardhjes së dimrit.

Burnham i bëri komentet gjatë një fjalimi në Kiev, para Katedrales së Shën Sofisë, me rastin e 35-vjetorit të pavarësisë së Ukrainës.

“Pavarësisht kërcënimeve të papranueshme të Rusisë ndaj vendit tim, ne do të vazhdojmë mbështetjen tonë për Ukrainën”, ka deklaruar kryeministri britanik.

Ai ka bërë thirrje për intensifikimin e presionit ndërkombëtar ndaj Moskës, me synim kufizimin e kapaciteteve të saj për të financuar luftën në Ukrainë.

“Ky është momenti për të vazhduar presionin ndaj Rusisë, momenti për t’ua kufizuar aftësinë për të financuar këtë luftë të paligjshme”, ka shtuar Burnham.

Në fjalimin e tij të parë madhor në skenën ndërkombëtare, kryeministri britanik ka vlerësuar qëndresën e popullit ukrainas, duke e cilësuar atë si një forcë mbrojtëse për të gjithë kontinentin evropian.

“Ukraina ka qenë mbrojtësja e Evropës, jo një barrë për sigurinë tonë, por vija e parë e frontit për ta mbajtur Evropën të sigurt. Populli ukrainas meriton jo vetëm mbështetjen tonë të vazhdueshme, por edhe mirënjohjen dhe respektin tonë”, është shprehur ai.

Vizita dhe deklaratat e Burnhamit vijnë në një periudhë kur Ukraina po kërkon forcimin e mbrojtjes ajrore përpara dimrit, mes shqetësimeve për vazhdimin e sulmeve ruse ndaj qyteteve dhe infrastrukturës energjetike të vendit.

The GeoPost