Rusia i bashkohet narrativës së Serbisë: Bashkëpunimin ushtarak Kosovë–Shqipëri–Kroaci e cilëson kërcënim për Ballkanin

Rusia ka intensifikuar retorikën kundër bashkëpunimit në fushën e mbrojtjes ndërmjet Kosovës, Shqipërisë dhe Kroacisë, duke iu bashkuar narrativës së Serbisë, e cila prej muajsh e ka cilësuar këtë iniciativë si një kërcënim për sigurinë rajonale.

Në një intervistë për agjencinë shtetërore ruse TASS, drejtori i Departamentit të Dytë Evropian në Ministrinë e Punëve të Jashtme të Rusisë, Yuri Pilipson, e përshkroi deklaratën trepalëshe të nënshkruar në mars të vitit 2025 si një përpjekje për krijimin e një “kuazi-blloku ushtarak” në Ballkan.

Sipas tij, bashkëpunimi ndërmjet Zagrebit, Tiranës dhe Prishtinës përfaqëson një vazhdim të politikës së NATO-s për militarizimin e rajonit.

“Krijimi i një kuazi-blloku ushtarak të përbërë nga Kroacia, Shqipëria dhe Kosova e vetëshpallur është një tjetër shembull i zbatimit të politikës së NATO-s për militarizim të përshpejtuar”, deklaroi Pilipson.

Diplomati rus përsëriti pothuajse të njëjtin qëndrim që autoritetet serbe kanë shprehur që nga nënshkrimi i deklaratës, duke pretenduar se bashkëpunimi ushtarak ndërmjet tri vendeve ka karakter të theksuar anti-serb.

Sipas tij, krijimi i një boshti Zagreb-Tiranë-Prishtinë përbën një faktor destabilizues për rajonin.

“Kjo çon në mënyrë të pashmangshme në përshkallëzim në Ballkan, sepse krijimi i një boshti të mbyllur Zagreb-Tiranë-Prishtinë, në rrethana kur aleatët e sapokrijuar nuk kanë marrëdhënie harmonike me fqinjët e tyre, është një faktor që i tensionon më tej marrëdhëniet në rajon”, tha ai.

Pilipson shprehu kundërshtimin edhe ndaj forcimit të kapaciteteve mbrojtëse të Kosovës, duke pretenduar se zhvillimi i Forcës së Sigurisë së Kosovës bie ndesh me Rezolutën 1244 të Këshillit të Sigurimit të OKB-së.

Ai paralajmëroi gjithashtu kundër përpjekjeve për ta afruar Kosovën me strukturat euroatlantike, duke theksuar se anëtarësimi në NATO kërkon pëlqimin e të gjitha vendeve anëtare.

Deklarata për bashkëpunim në fushën e mbrojtjes ndërmjet Kosovës, Shqipërisë dhe Kroacisë u nënshkrua më 18 mars 2025 në Tiranë nga ministrat e mbrojtjes të tri vendeve.

Sipas Ministrisë së Mbrojtjes së Kroacisë, dokumenti synon forcimin e sigurisë dhe stabilitetit në Evropën Juglindore, mbështetjen e integrimit euroatlantik, zhvillimin e kapaciteteve mbrojtëse, organizimin e trajnimeve dhe ushtrimeve të përbashkëta, si dhe luftimin e kërcënimeve hibride.

Megjithatë, deklarata nuk parashikon krijimin e një aleance të re ushtarake dhe as nuk përmban klauzola për mbrojtje të përbashkët ose ndërhyrje automatike ushtarake.

Që nga nënshkrimi i saj, Serbia e ka kundërshtuar vazhdimisht këtë iniciativë, ndërsa deklaratat e fundit të diplomacisë ruse tregojnë një përafrim të qartë me narrativën e Beogradit, duke e paraqitur bashkëpunimin ndërmjet Kosovës, Shqipërisë dhe Kroacisë si një kërcënim për stabilitetin në Ballkan.

The GeoPost