Trump: SHBA do të fokusohet në Ukrainë pas marrëveshjes me Iranin

Presidenti i Shteteve të Bashkuara, Donald Trump, ka deklaruar se Uashingtoni do të përqendrojë përpjekjet e tij diplomatike në zgjidhjen e luftës në Ukrainë, pasi është arritur një marrëveshje mirëkuptimi me Iranin.

Duke folur në një konferencë të përbashkët për shtyp me Presidentin francez Emmanuel Macron, në margjinat e samitit të G7 në Evian-les-Bains të Francës, Trump tha se administrata e tij synon të avancojë procesin e paqes në Ukrainë.

“Tani që kjo [marrëveshja me Iranin] ka përfunduar, ne do të përqendrohemi në atë [Ukrainë] për të parë nëse mund ta përfundojmë atë,” deklaroi Trump.

Ai vlerësoi gjithashtu bisedat e fundit telefonike me Presidentin rus Vladimir Putin dhe Presidentin ukrainas Volodymyr Zelensky, të cilat, sipas tij, kishin qenë “shumë të mira”.

“Pata dy biseda shumë të mira dje. Do të flasim për këtë [gjatë samitit të G7],” shtoi ai.

Sipas ndihmësit të Kremlinit, Yury Ushakov, telefonata mes Putinit dhe Trump më 14 qershor përfshiu diskutime mbi marrëveshjen SHBA–Iran dhe vizitën e planifikuar në Moskë të përfaqësuesve amerikanë Steve Witkoff dhe Jared Kushner. Po ashtu, Putin i ka uruar Trump-it 80-vjetorin e lindjes.

Në deklaratat e tij, Trump tha se është i gatshëm të ndikojë si te partnerët evropianë ashtu edhe te Ukraina për të avancuar procesin e paqes, përfshirë edhe takimet e planifikuara në kuadër të G7.

Nga ana tjetër, Putin ka deklaruar se përpjekjet e Kievit për të goditur infrastrukturën ruse “nuk do të ndryshojnë situatën në fushën e betejës”, ndërsa ka lënë të hapur mundësinë e një takimi me Zelenskyn, duke sugjeruar që ai të zhvillohet në Moskë.

The GeoPost