Pesë persona arrestohen në operacionin për hetimin e krimeve të luftës në rastin “Reçaku II”

Pesë persona janë arrestuar gjatë një operacioni policor të zhvilluar në kuadër të hetimeve për krime lufte, të cilat po zhvillohen nga Prokuroria Speciale e Republikës së Kosovës në bashkëpunim me Policinë e Kosovës.

Sipas njoftimit zyrtar, operacioni lidhet me rastin e njohur si “Reçaku II”, ndërsa gjatë aksionit janë realizuar disa urdhër-kontrolle në lokacione të ndryshme.

Prokurori i Prokurorisë Speciale, Ilir Morina, ka thënë se pesë të arrestuarit e sotshëm nga aksioni për krimet e luftës, janë të përfshirë në kryerjen e masakrës së Reçakut.

Në një konferencë për media pas përfundimit të aksionit, prokurori Morina tha se aksioni vjen pas 6 muajve hetime që pas ngritjes së aktakuzës për rastin e Reçakut.

“Gjatë hetimeve që kemi kryer përgjatë këtyre gjashtë muajve, kemi arritur t’i identifikojmë disa persona të cilët kanë qenë pjesë e njësive të posaçme të Policisë së Serbisë në atë kohë të cilat kanë marrë pjesë në aksionin e 15 janarit të vitit 1999 në Reçak.

Kemi bo kërkesë te gjyqtari i procedurës paraprake të Departamentit Special të Gjykatës Themelore në Prishtinë, ku kemi kërkuar urdhër-arrestin dhe urdhër-bastisjen. Sot në orët e hershme të mëngjesit, së bashku me Policinë kemi arrestuar pesë persona, të cilët janë të përfshirë në kryerjen e masakrës së Reçakut” – ka thënë prokurori Ilir Morina.

Rasti “Reçaku II” lidhet me hetimet për dyshime për kryerjen e veprave penale të krimeve të luftës gjatë konfliktit në Kosovë.

The GeoPost