Opozita në Serbi: Vuçiqi ka dërguar një aeroplan plot me kriminelë në Mal të Zi

Nënkryetari i Partisë së Lirisë dhe Drejtësisë (SSP), Borko Stefanoviq, reagoi lidhur me informacionin se policia e Malit të Zi ka ndaluar hyrjen në vend për një grup prej të paktën 90 personash nga Serbia, të cilët të mërkurën kishin mbërritur në Tivat me një fluturim “charter” nga Beogradi.

Stefanović tha se 90 personat, shumë prej të cilëve kanë dosje kriminale, janë dërguar personalisht nga presidenti i Serbisë, Aleksandar Vuçiq.

“Ja çfarë bën realisht Vuçiqi në rajon dhe si duket ‘rruga e tij evropiane’, në shembullin e fluturimit kriminal për në Tivat që e ka dërguar personalisht. Ai ka dërguar me avion charter, një aeroplan të tipit Embraer që është paguar në mënyrë të dyshimtë, 90 persona, shumë prej të cilëve kanë dosje kriminale, për të siguruar në mënyrë joformale Vuçiqin në Samitin BE–Ballkani Perëndimor në Tivat,” shkroi Stefanoviq.

Policia e Malit të Zi po i kthen ata në Serbi nga aeroporti i Tivatit, pasi është konstatuar se janë “persona të interesit për sigurinë”.

“Dërgimi i një formacioni para-policor është gjë normale dhe e zakonshme, por vetëm në koordinim të ngushtë me vendin pritës dhe kurrsesi 90 persona, përveç nëse je president i SHBA-së për shembull. Duket se Aleksandar Vuçiq nuk e kupton se nuk mund të sillet jashtë vendit si në shtëpi, ku nën pushtetin e SNS-së nuk dihet më kush është polic e kush kriminel. Ai nuk mund ta pranojë se nuk është as afër të qenit i rëndësishëm apo kryesor në Samitin në Tivat”, shtoi ai.

Opozitari serb pretendon se ky skandal është turp për Serbinë dhe se tregon fytyrën e vërtetë të Vuçiqit, të cilin e akuzon se synon të prishë marrëdhëniet me fqinjët dhe të krijojë konflikte, duke dëshmuar mungesën e një “rruge evropiane” të vërtetë dhe shkatërrimin e stabilitetit në Serbi dhe rajon.

Evo šta Vučić zaista radi u regionu i kako izgleda njegov “evropski put”, na primeru kriminalnog leta za Tivat koji je lično poslao:

– Poslao je čarter letom, avionom tipa Embraer koji je sumnjivo plaćen, 90 lica od kojih mnogi imaju kriminalni dosije da neformalno obezbeđuju…

— Borko Stefanović (@BorkoStef) June 3, 2026