Deklarata nxitëse e Vuçeviqit: Serbia “nuk do të qetësohet” derisa të lirohen serbët e dënuar në Kosovë

Deklarata e kryetarit të Partisë Progresive Serbe (SNS), Millosh Vuçeviq, se autoritetet serbe “nuk do të qetësohen derisa të lirohen serbët e dënuar për Banjskën”, ka nxitur reagime të forta në Serbi, ku analistë, opozitarë dhe përfaqësues serbë nga Kosova e kanë cilësuar atë si retorikë nxitëse, pa mbështetje reale politike apo juridike.

Reagimet erdhën pasi Vuçeviq, pas vendimit të shkallës së parë ndaj tre të akuzuarve për sulmin në Banjskë, deklaroi se “nuk ka fund lufta jonë” dhe se Serbia nuk do të ndalet derisa të lirohen të dënuarit.

Anëtari i Kryesisë së DSS-së së Re, Millosh Stankoviq, tha për Danas se deklarata e Vuçeviqit është vazhdimësi e narrativës radikale serbe që, për 18 vjet ka prodhuar vetëm degradim politik dhe moral.

“Shteti serb dhe populli serb po paguajnë çmimin e uljes së standardeve morale dhe juridike në emër të mbrojtjes së Kosovës”, tha Stankoviq, duke e lidhur deklaratën e Vuçeviqit me dështimin e politikës së ndërtuar nga marrëveshjet e Brukselit deri te aneksi i Ohrit.

Ai argumentoi se vetë institucionet që sot po gjykojnë serbët për Banjskën janë, sipas tij, produkt i politikave që kanë ndërtuar autoritetet aktuale në Beograd.

Në të njëjtën linjë, Rada Trajkoviq, presidente e Lëvizjes Evropiane në Kosovë, e quajti deklaratën e Vuçeviqit “boshe” dhe pa efekt për vetë të dënuarit dhe familjet e tyre.

“Ata njerëz u lanë në fatin e tyre nga organizatorët e Banjskës. Sot është e lehtë të bëhen deklarata nxitëse, kur asgjë nuk është bërë me kohë për t’i ndihmuar”, tha Trajkoviq.

Sipas saj, Beogradi duhej të kishte nisur me kohë një proces të vetin ligjor për rastin Banjska, si kundërpeshë ndaj procesit në Prishtinë, por kjo nuk ndodhi.

Edhe Milija Bishevac nga Lëvizja Popullore Serbe me Kosovën tha se qytetarët nuk i besojnë më deklaratave patriotike pa rezultate konkrete.

“Njerëzit nuk kërkojnë slogane, por siguri reale dhe mbrojtje institucionale”, tha ai, duke shtuar se mesazhe të tilla sot prodhojnë më shumë skepticizëm sesa shpresë.

Përfaqësuesi i pavarur serb nga Kosova, Zharko Ristiq, tha se përvoja ka treguar se “aty ku radikalët pretendojnë se mbrojnë serbët, ata më nuk mbeten aty”.

Sipas tij, pas më shumë se një dekade dialogu dhe kompromise, pozita e serbëve në Kosovë vetëm është përkeqësuar.

Politologu Ognjen Gogiq e interpretoi deklaratën e Vuçeviqit si mesazh të destinuar kryesisht për elektoratin e SNS-së, duke thënë se pas saj nuk pritet asnjë veprim konkret.

“Përveç pagesës së avokatëve, Beogradi as nuk mundet dhe as nuk dëshiron të bëjë më shumë”, tha Gogiq.

Ai argumentoi se pas sulmit në Banjskë, Kosova fitoi, siç u shpreh ai, “çek të bardhë” për veprime të ashpra kundër strukturave serbe.

“Serbët po mbesin në burg, ndërsa ata që e nisën gjithë këtë mbeten të lirë”, tha ai, duke shtuar se mënyra e vetme reale që Beogradi mund t’i ndihmojë është ndjekja penale e përgjegjësve për organizimin e sulmit në Banjskë.

The Geopost