Rrugëtimi 10-vjeçar i Ushtrisë së Kosovës – procesi i transformimit ka hyrë në vitin e tetë

Procesi i transformimit të Forcës së Sigurisë së Kosovës (FSK) në një forcë me kapacitete të plota ushtarake po zhvillohet sipas planifikimeve të parapara në planin dhjetëvjeçar të tranzicionit, ka bërë të ditur Ministria e Mbrojtjes e Kosovës.

Transformimi i FSK-së nisi më 14 dhjetor 2018, kur 106 deputetë të Kuvendit të Kosovës votuan tri projektligje që i hapën rrugë këtij procesi. Me këtë vendim institucional, Forca e Sigurisë së Kosovës hyri në një periudhë dhjetëvjeçare transformimi, që synon ndërtimin e një force moderne me kapacitete ushtarake.

Sipas Planit Gjithëpërfshirës të Tranzicionit – detajet e të cilit nuk janë bërë publike – FSK-ja ka marrë përgjegjësi të reja që lidhen me mbrojtjen dhe sigurinë e vendit. Këto përgjegjësi përfshijnë ruajtjen e sovranitetit dhe integritetit territorial të Kosovës, ofrimin e mbështetjes ushtarake për autoritetet civile, si dhe pjesëmarrjen në operacione ndërkombëtare.

Aktualisht, procesi i transformimit ka hyrë në vitin e tetë të planit dhjetëvjeçar. Në fazën e tretë dhe të fundit të këtij procesi, e cila parashihet të zgjasë nga viti 2025 deri në vitin 2028, fokusi kryesor do të jetë ngritja e kapaciteteve ajrore të forcës.

Në këtë fazë planifikohet edhe blerja e helikopterëve dhe mjeteve të tjera ajrore, që pritet të rrisin ndjeshëm aftësitë operacionale të FSK-së dhe të kontribuojnë në zhvillimin e kapaciteteve të saj mbrojtëse.

Sipas Ministrisë së Mbrojtjes, në disa drejtime transformimi është duke përparuar edhe më shpejt sesa ishte planifikuar fillimisht. Një nga këto fusha është rekrutimi i pjesëtarëve të rinj.

Nga viti 2021 deri në vitin 2023 janë rekrutuar gjithsej 1.836 ushtarë të rinj, duke rritur ndjeshëm kapacitetin njerëzor të forcës.

Aktualisht, Forca e Sigurisë së Kosovës ka rreth 2.500 pjesëtarë aktivë. Pas përfundimit të periudhës së tranzicionit, ky numër pritet të rritet në mbi 7.500 pjesëtarë, duke përfshirë ushtarë aktivë dhe rezervistë.

Forca e Sigurisë së Kosovës është themeluar në vitin 2009 në bazë të Planit të Ahtisaarit, dokumenti që përcaktoi kornizën për pavarësinë e Kosovës. Pas përfundimit të luftës në Kosovë, në marrëveshje me NATO-n u krijuan Trupat Mbrojtëse të Kosovës, të cilat fillimisht kishin rol kryesisht në menaxhimin e emergjencave dhe operacioneve civile.

Më vonë, këto struktura u transformuan në Forcën e Sigurisë së Kosovës, duke krijuar bazën për zhvillimin gradual të një force profesionale të sigurisë.

Ndërkohë, Qeveria e Kosovës ka miratuar në parim edhe nismën për lidhjen e një marrëveshjeje kornizë për thellimin e bashkëpunimit në fushën e mbrojtjes ndërmjet Kosovës dhe Shteteve të Bashkuara të Amerikës.

Ky bashkëpunim konsiderohet një hap i rëndësishëm në forcimin e kapaciteteve mbrojtëse të vendit dhe në avancimin e partneritetit strategjik me aleatët ndërkombëtarë.

Së fundi, Kosova ka marrë edhe një ftesë nga presidenti i Shteteve të Bashkuara, Donald Trump, për ta përfaqësuar vendin në Bordin e Paqes për Gazën.

Ky mekanizëm është pjesë e planit 20-pikësh të presidentit amerikan për t’i dhënë fund konfliktit ndërmjet Izraelit dhe Hamasit, grup i shpallur terrorist nga SHBA-ja dhe disa fuqi të tjera ndërkombëtare.

Përfshirja e Kosovës në iniciativa të tilla ndërkombëtare shihet si dëshmi e rolit gjithnjë e më aktiv të vendit në çështjet e sigurisë dhe stabilitetit global, ndërkohë që procesi i transformimit të FSK-së vazhdon të jetë një nga projektet më të rëndësishme strategjike për institucionet e Kosovës.

The Geopost

=