Propagandistët e Vuçiqit në aksion: Retorikë luftënxitëse pa bazë ndaj Kosovës

Kryetari i Komisionit për Mbrojtje dhe Punë të Brendshme në Kuvendin e Serbisë, Milovan Drecun, ka deklaruar gjatë një paraqitjeje në programin e mëngjesit të RTS-së se dërgesat e armatimit të ri dhe bashkëpunimi ushtarak i Prishtinës me disa shtete tregojnë “rreziqe serioze për sigurinë”.

Drecun tha se “që nga fillimi i fazës përfundimtare të transformimit të Forca e Sigurisë së Kosovës (FSK-së) është intensifikuar pajisja dhe trajnimi i kësaj formacioni”, gjë që, sipas tij, bie ndesh me Rezolutën 1244.

Sipas tij, në katër vitet e fundit janë investuar 430 milionë euro, kryesisht në pajisje dhe armatim.

Ai thekson se vërehet rritje e buxhetit ushtarak, krijimi i marrëveshjeve bilaterale dhe të inteligjencës, si dhe pjesëmarrja e pjesëtarëve të këtyre njësive në stërvitje ushtarake ndërkombëtare.

Ai shton se po punohet edhe në ngritjen e një industrie të vet ushtarake, përfshirë prodhimin e paralajmëruar të municionit, dronëve dhe automjeteve të blinduara.

“Kur i shihni të gjitha këto, shihni një militarizim të plotë të Kosovës”, tha Drecun.

Duke folur për mesazhet që, sipas tij, po dërgon Prishtina, Drecun vlerëson se bëhet fjalë për përgatitje për veprime ofanzive.

“Këto nuk janë kapacitete mbrojtëse, por ofanzive. Prishtina po përgatitet për një desant ushtarak dhe dëshiron interoperabilitet me vendet anëtare të NATO-s, para së gjithash me Kroacinë dhe Shqipërinë”, theksoi ai.

Sipas tij, mesazhi kryesor u drejtohet autoriteteve në Beograd.

“Mesazhi është – larg duart nga Kosova. Ekziston rrezik real që, në rrethana të caktuara gjeopolitike, të provohet hyrja në veri të Kosovës, gjë që do të nënkuptonte kërcënim të drejtpërdrejtë për sigurinë dhe mbijetesën e popullit serb”, paralajmëroi Drecun.

Duke folur për përgjigjen e Serbisë, ai theksoi se roli më i rëndësishëm i kapaciteteve mbrojtëse është ai preventiv.

“Ushtria më e mirë është ajo që përgatitet vazhdimisht për luftë, por kurrë nuk hyn në të. Forcimi i kapaciteteve tona mbrojtëse ka efekt parandalues dhe shërben për ruajtjen e paqes”, përfundoi Drecun.

Propagandë dhe retorikë luftënxitëse sipas detyrës së Vuçiqit

Deklaratat dhe interpretimet e Drecunit, sipas të cilave Serbisë – e cila ndërkohë po armatoset me shpejtësi – i kanoset një kërcënim ushtarak nga rajoni, janë në frymën e propagandës së diktuar nga “eksperti i lartë i retorikës luftënxitëse”, nxënës i Sheshelit – presidenti i Serbisë, Aleksandar Vuçiq, vetëm pak ditë më parë. Edhe Drecun, si zakonisht, është “në lartësinë e detyrës”.

Kujtojmë se Vuçiq, në një mbledhje urgjente të Këshillit për Siguri Kombëtare, i paraqiti opinionit publik të Serbisë doktrinën e mbrojtjes, duke deklaruar se Serbia është nën kërcënim sulmi nga rajoni, por jo nga Amerika.

“Nuk do të na sulmojë Amerika, por këta nga rajoni”, tha ai, duke iu referuar armatosjes së Kosovës dhe aleancës ushtarako-mbrojtëse Kosovë–Shqipëri–Kroaci, të cilën, sipas tij, po e bëjnë me urdhër të huaj.

“Brenda natës, nga kapacitete mbrojtëse po shndërrohen në ofanzive”, prandaj, sipas tij, po zhvillohet “një fushatë kundër meje dhe Ushtrisë së Serbisë”.

“Na shqetëson veçanërisht armatosja e mëtejme e Prishtinës, në kundërshtim me Kartën e OKB-së dhe Rezolutën 1244, e cila është pezulluar de facto, por jo de jure nga fuqitë e mëdha, si Turqia”.

Si kërcënim të veçantë për sigurinë e Serbisë, ai theksoi aleancën e Kosovës me Kroacinë dhe Shqipërinë.

“Planifikojnë të zhvillojnë sisteme më komplekse luftarake, nga automjete me armë katër herë më të fuqishme, dhe dua të them se Serbia po i ndjek me vëmendje këto zhvillime. Jo vetëm që po i ndjekim, por po përgatitemi për mbrojtje nga ata që hapur kërcënojnë vendin tonë”, tha Vuçiq.

Ai shprehu shpresën se fuqia e Serbisë do të jetë faktor i mjaftueshëm parandalues.

“Do të kemi përforcime të konsiderueshme të kapaciteteve tona ushtarake. Në një vit e gjysmë do t’i dyfishojmë kapacitetet ushtarake – jo numrin e trupave, por fuqinë e zjarrit dhe gjithçka tjetër. Një pjesë të armëve i sigurojmë këtu, një pjesë jashtë vendit. Ky është i vetmi mënyrë e sigurt për mbrojtjen e vendit tonë në të ardhmen dhe faktori i vetëm real parandalues. E patë në Venezuelë – mund të mbështetemi vetëm te vetja. Edhe nëse dikush nga rajoni do të nisej kundër nesh, askush nuk do të na ndihmonte përveç nesh”, tha Vuçiq./TheGeoPost.