Ukraina dyshon se Rusia qëndron pas vrasjes së ish-kryparlamentarit Parubiy

Policia ukrainase dyshon se Rusia është përfshirë në vrasjen e fundit të ish-kryetarit të parlamentit Andriy Parubiy.

“Ne e dimë që ky krim nuk ishte aksidental. Ka një përfshirje ruse. Të gjithë do të mbahen përgjegjës para ligjit”, tha të hënën shefi i policisë Ivan Vyhivskyi.

Parubiy, ishte një mbështetës i zëshëm i pavarësisë dhe sovranitetit të Ukrainës. Ai u vra në mes të ditës në qytetin perëndimor të Lvivit të shtunën.

Se një i dyshuar është ndaluar, e ka konfirmuar presidenti i Ukrainës, Volodymyr Zelenskyy, i cili tha se ministri i Brendshëm Ihor Klymenko dhe kreu i Shërbimit të Sigurisë së vendit Vasyl Maliuk e kishin informuar atë për kapjen e të dyshuarit.

“Të gjitha rrethanat e kësaj vrasjeje të tmerrshme duhet të sqarohen”, tha Zelenskyy në rrjetin X.

Një video e paverifikuar që qarkullon në mediat ukrainase duket se tregon sulmuesin e dyshuar, i cili ishte në një biçikletë i veshur si korrier ushqimi, duke qëlluar Parubiy-n përpara se të largohej nga vendi i ngjarjes.

Deri më tani, nuk janë dhënë informacione mbi identitetin apo motivin e të dyshuarit.

Parubiy, 54 vjeç, ishte një figurë e shquar në protestat pro-demokraci të Ukrainës në vitin 2004 dhe protestat në Maidan në vitin 2013./The Geopost/