Mijëra serbë të Bosnjës marrin pjesë në tubimin që mohon gjenocidin e Srebrenicës në 1995

Mijëra serbë të Bosnjës mbajtën një tubim të enjten dhe mohuan se ishte kryer gjenocid në Srebrenicë në vitin 1995, pavarësisht se dy gjykata të Kombeve të Bashkuara konstatuan ndryshe.

Më shumë se 8,000 burra dhe djem myslimanë boshnjakë u ekzekutuan nga trupat serbe të Bosnjës në enklavën lindore të Bosnjës në korrik 1995. Eshtrat e viktimave u hodhën në varre masive dhe më vonë u rivarrosën për të mbuluar provat e mizorive.

Gjykata ndërkombëtare në Hagë, Holandë, e ka cilësuar krimin në Srebrenicë një gjenocid, i pari në Evropë që nga Lufta e Dytë Botërore. Oficerët e lartë të ushtrisë serbe të Bosnjës dhe udhëheqësit politikë janë shpallur gjithashtu fajtorë për gjenocid nga gjyqtarët e OKB-së.

Srebrenica ishte një “gabim” dhe një “krim i madh”, tha udhëheqësi separatist serb i Bosnjës Milorad Dodik në tubimin në qytetin veriperëndimor të Banja Lukës, qendra kryesore administrative e serbëve të Bosnjës. “Por nuk ishte gjenocid.”

Tubimi u organizua në protestë kundër projekt-rezolutës së OKB-së që përkujton gjenocidin e Srebrenicës, e cila mbështetet nga politikanët boshnjakë në Bosnje, si dhe nga një numër vendesh evropiane dhe Shtetet e Bashkuara.

Rezoluta ende nuk është miratuar në OKB, por serbët e Bosnjës dhe Serbia fqinje e kanë kundërshtuar ashpër atë, duke thënë se ajo do t’i cilësonte serbët një “komb gjenocidal”. Serbët mbështeten nga Rusia dhe Kina.

Mohimi i gjenocidit dënohet sipas ligjit boshnjak. Megjithatë, parlamenti serb i Bosnjës miratoi të enjten një raport që mohon gjenocidin e Srebrenicës.

Dodik përsëriti kërcënimet e tij se serbët e Bosnjës, të cilët kontrollojnë rreth gjysmën e Bosnjës, do të shkëputeshin nga pjesa tjetër e vendit nëse rezoluta e Srebrenicës miratohet në Asamblenë e Përgjithshme të OKB-së.

Gjysma tjetër e Bosnjës drejtohet nga boshnjakët e vendit, të cilët janë kryesisht myslimanë, dhe kroatë.

“Ne nuk duam të jetojmë në një shtet me ju (boshnjakët) dhe nuk do të jetojmë në një shtet me ju,” tha Dodik. “Ne do ta bëjmë atë (ndarjen) nëse kushtet janë të përshtatshme.”

Kryetarja e Kuvendit të Serbisë dhe kryeministrja në largim Ana Brnabiq mori pjesë gjithashtu në takimin në Banja Luka.

Dodik është fort pro-rus dhe është sanksionuar nga SHBA dhe Britania për separatizmin e tij. Ai udhëtoi për në Rusi dhe u takua me presidentin rus Vladimir Putin pavarësisht pushtimit të Ukrainës dhe në kundërshtim me Perëndimin.

Në fjalimin e tij, Dodik tha se shpresonte se një fitore e mundshme e ish-presidentit Donald Trump në zgjedhjet e ardhshme në SHBA do të “krijonte kushte të ndryshme në të cilat do të luajmë”. Ai nuk dha detaje. Dodik e mbylli fjalën e tij me thirrjen “Rroftë Rusia!”

Bosnja mbetet e ndarë etnikisht dhe politikisht e tensionuar shumë kohë pas përfundimit të luftës së viteve 1992-1995. Vendi i trazuar ballkanik po kërkon anëtarësimin në Bashkimin Evropian, por ndarjet e brendshme i kanë penguar përpjekjet e tij mes frikës së destabilitetit për shkak të luftës që po shpërthen në Ukrainë.

/apnews.com