Sot mbahet “Samiti ballkanik për dezinformimin”

“The Geopost” sot (e enjte) do të jetë nikoqir i “Samitit ballkanik për dezinformimin”. Njohës të kësaj fushe nga vende të ndryshme të botës do të jenë pjesë e paneleve, për të diskutuar për dezinformimin, luftën në Ukrainë, Inteligjencën Artificiale (AI), mediat, influencën e Kinës në Lindje të Mesme etj.

Në kuadër të këtij samiti, për komunikimin strategjik të Kosovës para të pranishmëve do të flas ministri i Mbrojtjes, Ejup Maqedonci.

Ndërkaq në panelin e parë për dezinformimin në Evropë do të flasin: Jashna Jelisie, Jakub Kalensky, Jana Kazas, Vladimir Sazonov dhe Dietmar  Pichler.

Për agresionin ushtarak rus në luftën në Ukrainë do të flasin gazetaret ukrainase Lydmila Makey, Tatyana Synelnyk, si dhe historiani ukrainas, Vladislav Havrylov.

E nga Amerika për dezinformimin në media sociale do të tregojë Jason Steinhauer.

Vëmendje e posaçme në këtë samit do t’i kushtohet edhe dezinformimit në Ballkan dhe influencës ruse, tema të cilat do t’i shtjellojnë panelistët: Milan Jovanovic nga Mali i Zi, Boris Varga nga Serbia, Rosana Aleksoska nga Maqedonia Veriore, Gerta Zaimi nga Shqipëria. Ljubomir Filipoviq nga Mali i Zi dhe Darko Brkan nga Bosnja e Hercegovina.

Dezinformimi në Lindje të Mesme dhe influenca kineze është po ashtu në fokus të Samitit ballkanik për dezinformimin, për çka do të flasin: Ruslan Trad nga Bullgaria, Nicos Panagiotou nga Greqia, Ana Krstinovska nga Maqedonia e Veriut dhe Gil   Hoffman nga Izraeli.

Po ashtu, në kuadër të Samitit për dezinformimin në Ballkan do të flasin edhe profesorët amerikanë Janet Johnson e Michael Beam.

“Samiti ballkanik për dezinformimin” nis në ora 9:30 dhe mbahet në Swiss Diamond Hotel, në Prishtinë.

/The Geopost