Vuçiq prezanton sistemin antidron që e bleu nga Rusia, paralajmëron blerje të reja armatimi

Presidenti i Serbisë, Aleksandar Vuçiq, e kishte mbajtur të fshehtë deri më tani blerjen e një sistemi antidron që e ka blerë kohë më parë nga Rusia, teksa ka prezantuar të mërkurën një sistem rus për mbrojtje ndaj dronëve, të quajtur Repellent, të cilin Serbia e bleu nga aleatja e vet, Rusia.

Ky sistem ka për qëllim pengimin e kontrollit të dronëve dhe e mbulon një sipërfaqe prej 30 kilometrash, u tha gjatë shfaqjes së armëve dhe pajisjeve ushtarake në qytetin jugor të Serbisë, Nish, gjatë një feste Kombëtare të Serbisë.

Në fund të janarit, Vuçiqi paralajmëroi për prezantimin e një sistemi të tillë antidron, por ai nuk tregoi se kur e mori Serbia saktësisht sistemin e ri, përveç se shtoi se “Serbia ka paguar për të shumë kohë më parë”.

Më 14 shkurt, gjatë shfaqjes së armëve në Nish, lideri serb paralajmëroi për investime shtesë në pajisje për Forcat e Armatosura të Serbisë, posaçërisht në artileri.

Ai tha se 300 milionë euro janë duke u investuar në prodhimet e industrisë vendore.

Vuçiq njoftoi gjithashtu se dronë shtesë, CH-95, do të blihen nga Kina, njoftoi agjencia e lajmeve Beta.

Për shkak të bashkëpunimit me Rusinë dhe Kinën në fushën e mbrojtjes, Serbia, si kandidate për anëtarësim në Bashkimin Evropian (BE), është kritikuar vazhdimisht nga Brukseli.

Ajo ka blerë vazhdimisht pajisje ushtarake dhe armë nga Rusia prej vitit 2016.

Për shkak të pushtimit të Ukrainës, Rusia është nën sanksione nga Bashkimi Evropian, Shtetet e Bashkuara të Amerikës dhe vende të tjera perëndimore.

Serbia refuzon t’i respektojë këto sanksione, ndërsa po afrohet gjithnjë e më shumë me Rusinë e Kinën për blerje të armatimeve.

Lëvizjet e tilla shpesh kritikohen në Bashkimin Evropian dhe paralajmërohet për rrezikun e një destabizilimi në rajon.

Ndërkaq, Sekretari i Përgjithshëm i NATO-s Jens Stoltenberg ka folur për rritjen e tensioneve në Kosovë dhe Ballkanin Perëndimor dhe i bëri thirrje Kosovës e Serbisë të përmbahen nga rritja e tensioneve.

“Mesazhi im është që të gjitha palët duhet të përmbahen nga gjuha përçarëse dhe nga veprimet që mund të eskalojnë më shumë tensionet në rajon. Kur vjen puna për Kosovën, rruga përpara është dialogu i lehtësuar nga BE-ja, dhe inkurajoj Prishtinën dhe Beogradin që të angazhohen në mirëbesim në dialog”, ka thënë Stoltenberg.

/TheGeopost