Vuçiq në krah të Iranit: ShBA shkeli të drejtën ndërkombëtare

Presudenti i Serbisë, Aleksandër Vuçiq ka kërcënuar duke thënë se nëse Serbia do të sulmohej, ai do të shpaloste një rezistencë të pakrahasueshme, më të fortë se më 1999.

Pas seancës së kolegjiumit të zgjeruar të Shefit të Shtabit të Përgjithshëm, ai theksoi se të hënën ishte “një nga pikat e kthesës për ndryshimet që do të vijnë në ushtrinë serbe”, derisa shprehi shqetësimet e tij nga përshkallëzimi i tensioneve në botë, veçanërisht sulmi i Shteteve të Bashkuara ndaj Iranit. Lidhur me këtë, ai doli në krah të Iranit duke thënë se ShBA ka shkelur të drejtën ndërkombëtare.

Sipas Vuçiq, vendi i tij ka nevojë për “të rritur aftësitë mbrojtëse”.

“Sipas kësaj doktrine, ushtria jonë duhet të jetë pakrahasueshmërisht më e fortë. Gjatë vitit të kaluar, ne kemi bërë shumë për të modernizuar dhe avancuar ushtrinë tonë. Sot, kemi një situatë në një botë ku ligji dhe drejtësia nuk kanë ekzistuar për një kohë të gjatë dhe nuk ka më rregulla. Ne duhet ta pranojmë dhe ta kuptojmë këtë”, tha Vuçiq.

Ai komentoi edhe për luftën Izrel – Iran dhe sulmin e ShBA-së në këtë të fundit.

“Të dy kombet janë miqësore me ne. Ne duam paqe dhe nuk e kuptoj pse gjërat nuk u zgjidhën përmes diplomacisë. Për të qenë specifik, pasi një njeri duhet të jetë i drejtë si me veten ashtu edhe me vendin. Ne duam marrëdhëniet më të ngushta me Shtetet e Bashkuara, një partneritet strategjik. Ne jemi një vend i vogël. Por nuk ka dyshim nëse ata shkelën të drejtën publike ndërkombëtare”, tha Vuçiq.

“Nuk ka të drejta, nuk ka drejtësi. Dhe më e rëndësishmja, nuk ka rregulla në botën e sotme. Së dyti, më lejoni t’i përgjigjem pyetjes suaj. Si do t’iu tregoni të gjithë ju nga Perëndimi tani rusëve ose kujtdo tjetër për shkeljen e integritetit territorial të dikujt? Kur e shkelët të gjithë ju? E shkelët atë në shembullin e Serbisë dhe RFJ-së. Por shumë e kanë harruar, ishte shumë kohë më parë, 26 vjet më parë. Dhe kjo ka ndodhur tani. Cilat janë parimet? Cilat janë rregullat mbi bazën e të cilave do të arrihet paqja?”, shtoi ai.

Ai iu përgjigj gjithashtu pyetjes pse Serbia eksporton municione në Izrael dhe tha se pas fillimit të luftës në Iran, gjithçka u ndal.

“Ne shesim municione, nga të cilat 24,000 njerëz jetojnë këtu drejtpërdrejt dhe 50,000 tërthorazi. Pra, ka rreth 150,000 njerëz me familje në këtë vend. Unë nuk do t’i lë 150,000 njerëz pa bukë. Përkundrazi, puna ime si president ishte të hapja tregje për ta. Unë hapa pothuajse të gjitha tregjet aziatike për ta. Tregun amerikan”, deklaroi Vuçiq.

Kujtojmë se së fundmi, Vuçiq ka deklaruar se Serbia është armatosur në fshehtësi duke e bërë të pathyeshme ushtrinë serbe. Ai ka paralajmëruar për në shtator edhe paradën, ku sipas tij do të prezantohet ky armatim. Sipas tij, kjo do të jetë parada më e madhe deri më sot, me të paktën 10,000 ushtarë./The Geopost/