Tubimi në Beograd akuzon policinë për përdorim dhune kundër protestuesve antiqeveritarë

Mijëra protestues të udhëhequr nga studentët marshuan në Beograd më 8 shtator, duke kërkuar që autoritetet serbe të ndëshkojnë oficerët e policisë për dhunën kundër demonstruesve gjatë protestave të fundit antiqeveritare.

Demonstruesit brohoritën slogane duke kritikuar Presidentin serb Aleksandar Vuçiq për mos shpalljen e zgjedhjeve të parakohshme dhe shprehën zemërim ndaj asaj që e quajtën brutalitet policor.

“Ndërsa isha shtrirë në tokë dhe nuk rezistoja, një oficer policie më goditi në kokë nga pas me shkop,” tha Aleksandra Nikoliç, një studente që foli në tubim. “Si rezultat, pësova lëndime të rënda në kokë dhe gojë, si dhe lëndime të lehta në mjekër, duar dhe gjunjë.”

Një tjetër studente, Nikolina Sindjeliq, raportoi në tubim se ajo dhe protestues të tjerë ishin rrahur nga policia dhe akuzoi median shtetërore se po përpiqej të “justifikonte dhunën me gënjeshtra”.

Sindjeliç tha se ishte ngacmuar seksualisht edhe pas arrestimit të saj gjatë një demonstrate muajin e kaluar. “I gjithë sistemi shtetëror është i drejtuar kundër qytetarëve të vet,” tha ajo në një fjalim jashtë selisë së një njësie speciale të policisë.

Protestuesit u sulmuan me gaz lotsjellës dhe plumba gome, tha Sindjeliç, duke shpjeguar se policia “na rrahu sepse ka frikë prej nesh”. Turma e përshëndeti fjalimin e saj dhe brohoriti “Ai ka mbaruar”, duke iu referuar Vuçiqit.

Protestuesit hodhën gjithashtu bojë të kuqe në muret e jashtme të selisë së policisë.

Vuçiq, pro-rus, hodhi poshtë kërkesën e studentëve për zgjedhje të parakohshme parlamentare dhe intensifikoi shtypjen e protestave, të cilat kanë ndodhur rregullisht që kur një pjesë e çatisë së stacionit të trenit në Novi Sad u shemb, duke vrarë 16 persona.

Dhjetëra njerëz u plagosën gjatë një proteste në kampusin universitar në Novi Sad më 5 shtator. Policia përdori gaz lotsjellës dhe i sulmoi protestuesit për t’i shpërndarë ata.

Policia mohon akuzat për dhunë dhe thotë se veproi “ligjërisht dhe profesionalisht” në përgjigje të sulmeve nga protestuesit që hodhën flakë dhe objekte të tjera ndaj tyre.

Një protestuese në Beograd, e cila u identifikua si Andrea, i tha Radios Evropa e Lirë se policia sillet në këtë mënyrë edhe në kohë normale, kështu që nuk ishte një surprizë.

“Por zyra e prokurorit është ajo që duhet të përgjigjet,” tha ajo. “Sipas mendimit tim, gjyqësori është i vetmi institucion i mbetur si vija e fundit e mbrojtjes.”

Jelena Stojic, një avokate, pyeti pse nuk është ngritur asnjë ndjekje penale.

“Ku është kontrolli i brendshëm i Ministrisë së Brendshme?” pyeti ajo. “Dhe së fundmi, si institucioni më i rëndësishëm, ku është Prokuroria Publike dhe çfarë bën ajo?”/Rferl/