ShBA përgenjështron Dodikun se është “gati për BE”: Jeni i përqafuar me Putinin

Ambasada e Shteteve të Bashkuara në Bosnjë e Hercegovinë ka përgenjështruar presidentin e Republikës Srpska, Milorad Dodik se ai është gati për Bashkimin Evropian. Ambasada ka shkruar për lidhjen e tij me Vladimir Putinin dhe veprimet destabilizuese të tij kundër Marrëveshjes së Dejtonit.

“Milorad Dodik pretendon se ai është ‘gati për BE’, por përqafimi i tij ndaj Vladimir Putinit dhe pushtimit brutal të Rusisë në Ukrainë, retorika dhe veprimet e tij kundër Dejtonit, dhe sulmet e tij ndaj institucioneve të nivelit shtetëror të nevojshëm për të naviguar në udhëtimin e Bosnjë-Hercegovinës për integrimin euroatlantik e përgënjeshtrojnë pretendimin e zotit Dodik”.

Ambasada Amerikane ka shkruar se integrimi i Bosnjë dhe Hercegovinës në institucionet euroatlantike kërkon përpjekjet kolektive të të gjithë akterëve politikë.

“Në vend që të angazhohet në negociata me mirëbesim me partnerët e tij qeverisës të koalicionit, z. Dodik vazhdon të praktikojë një politikë bllokimi dhe shantazhi, ndërsa kërkon të fajësojë të tjerët për mungesën e progresit. Kushtet 1+3 të përcaktuara nga Bashkimi Evropian janë të qarta dhe të lehta për t’u kuptuar. Standardet e kërkuara për t’i përmbushur ato janë të drejtpërdrejta dhe të thjeshta. Pyetja për zotin Dodik është nëse ai është i përgatitur të bëjë punën e nevojshme për përmbushjen e këtyre kushteve, punë që mund dhe duhej të kishte përfunduar muaj më parë. Deri më tani, përgjigjja është ‘jo’”, thujet në shkrimin e Ambasadës.

“Ultimatumet e zotit Dodik nuk përbëjnë një angazhim të mirëbesimit me partnerët e tij të koalicionit dhe nuk pasqyrojnë një angazhim të vërtetë ndaj BE-së. Pengesa kryesore drejt një të ardhmeje evropiane për BiH është z. Dodik dhe politika e tij shkatërruese. Ai tani dëshiron t’i shpëtojë përgjegjësisë për veprimet e tij, por nëse BiH nuk bën një hap tjetër përpara në mars, është e qartë se ku do të jetë faji: tek zoti Dodik”, ka përfunduar Ambasada.

Ky është reagimi i radhës ndër shumë të tjerë që ka bërë kundër politikani nacionalist serb i cili gjen mbështetje te Beogradi zyrtar dhe kisha serbe për të gjitha veprimet e tij. Dodik ka kërcënuar shpesh me ndarje.

“Ne po shqyrtojmë seriozisht marrjen e një vendimi për pavarësi dhe shkëputje të Republikës Sërpska [nga Bosnja], nëse nuk zgjidhet çështja e pronës”, tha Dodik nga Beogradi vitin e kaluar kur u prit nga presidenti serb, Aleksandar Vuçiq.

Dodik është i sanksionuar nga SHBA-ja dhe Britania për përpjekje për destabilizim dhe për korrupsion, ka kërcënuar disa herë se do të kërkojë pavarësinë e Republikës Sërpska nga pjesa tjetër e Bosnjës./TheGeopost