“Rrëfime nga Ukraina” në Tetovë: Çlirimi i Ukrainës është kusht për sigurinë e Evropës

Ukraina është e gatshme të luftojë për çdo centimetër të saj, deri në çlirimin përfundimtar. Këtë të martën e thanë një delegacion zyrtarësh, aktivistësh dhe intelektualësh nga Ukraina, në një debat të organizuar me studentë dhe pedagogë të Universitetit të Tetovës, raporton The Geopost.

Politologu nga Ukraina dhe autori i librit “Si funksionon propaganda e Putinit”, Mikola Davidyuk, tha se që nga viti 2016, që kur është botuar ky libër, në mënyrë shumë agresive është rritur edhe më shumë propaganda ruse.

Sipas tij, gjatë kësaj periudhe shumë politikanë dhe gazetarë kanë qenë vegla të cilët kanë tentuar të vjedhin dhe të shkatërrojnë gjithçka që Ukraina ka ndërtuar që nga pavarësia e saj. D

avidyuk shtoi se sot, Ukraina, në mënyrë të dëshpëruar tenton të krijojë bashkimin e botës demokratike kundër agresionit Rus. “Çlirimi i çdo cepi të territorit të Ukrainës është kusht për sigurinë e Evropës”, shtoi ai.

Në këtë tribunë, Davidyuk shfaqi edhe disa video-incizime të shkatërrimeve që ka lënë pas vete ushtria ruse, përfshirë banesa, shtëpi, shkolla, institucione, objekte afariste dhe infrastrukturë.

Tetjana Sçerbak, zëvendës guvernatore e Rajonit të Kievit, tha se Ukraina është e vendosur të luftojë deri në çlirimin e centimetrit të fundit të territorit të saj, pa marrë parasysh çmimin që do ta paguaj. Ajo e falënderoi audiencën e përbërë nga studentë dhe pedagogë të UT-së, si dhe nga aktivistë e gazetarë, për përkrahjen që i jep bota demokratike luftës në Ukrainë.

Ndërsa Nenad Çanak, politikan dhe aktivist për paqe dhe demokraci nga Serbia, tha se agresioni i Rusisë në Ukrainë mund të shpjegohet me një fjali: një ideologji totalitare dhe perandorake sulmoi një vend që po përpiqet të bëhet anëtar i Bashkimit Evropian (BE) dhe NATO-s.

Në cilësi të nikoqirit, Rektori i UT-së, Jusuf Zejneli, tha se sot Universiteti i Tetovës, në bashkëpunim me Institutin për Bashkëpunim Rajonal BIRC po e organizon këtë tribunë kushtuar luftës në Ukrainë ku “po cenohen vlerat themelore të demokracisë, liritë dhe të drejtat themelore të një populli”.

“Ju e dini se agresioni që zhvillohet ndaj kësaj popullate, sigurisht që do vëmendje të veçantë, dhe në këtë rast do të trajtohen nga studiues dhe ekspertë të ndryshëm. Andaj është edhe interes i përgjithshëm që institucionet e shkollimit të lartë të trajtojnë tema të cilët kanë të bëjnë me cenimin e vlerave demokratike në tërësi”, tha Zejneli.

Tribuna e titulluar “Rrëfime nga Ukraina” u organizua nga Instituti për Bashkëpunim Rajonal BIRC  dhe Universiteti i Tetovës (UT)./The Geopost/