Përfundon trajnimi i personelit ukrainas për heqje të minave, Hovenier krenar me bashkëpunimin SHBA-Kosovë

Sot ka përfunduar trajnimi gjashtë javor i grupit të parë të personelit ukrainas në heqjen e minanve, një trajnim ky i realizuar nga instruktorët e FSK-së në bashkëpunim me Komandën Evropiane të Shteteve të Bashkuara të Amerikës.

Ambasadori i Shteteve të Bashkuara në Kosovë, Jeff Hovenier, tha se është krenar për bashkëpunimin mes dy shteteve për të ndihmuar në përpjekjet që të mbahen të sigurt populli i Ukrainës.

“Sot grupi i parë i Policisë Kombëtare të Ukrainës dhe Shërbimeve Shtetërore të Emergjencave u diplomua nga një nismë e përbashkët trajnimi e Komandës Evropiane të SHBA-së dhe Forcave të Sigurisë së Kosovës për heqjen e sigurt të minave dhe pajisjeve të municioneve të pashpërthyera. Krenar që e dëshmojmë këtë përpjekje SHBA-Kosovë për ta mbajtur popullin ukrainas të sigurt dhe për të qëndruar me partnerët tanë kosovarë në solidaritet me Ukrainën”, ka thënë Hovenier.

Në ceremoni të diplomimit mori pjesë edhe Ministri i Brendshëm i Kosovës, Ejup Maqedonci. Ai tha se Republika e Kosovës qëndron e vendosur që krahë Shteteve të Bashkuara të Amerikës dhe vendeve tjera demokratike të mbështesë luftën e drejtë të popullit të Ukrainës kundër agresionit të paprovokuar dhe të padrejtë rus.

“Tani kur Ukraina po përballet me agresorin rus, qëndresa e popullit ukrainas përbën element të rëndësishëm të të ardhmes së politikave demokratike të shteteve. Kontributi i çdo shteti për të përkrahur të drejtën, paqen, duke mbështetur luftën për liri të shtetit të pavarur ukrainas është i paçmim dhe mbi të gjitha është obligim njerëzor. Në këtë aspekt më vjen mirë që si shtet jemi duke kontribuar në krahun e duhur, atë të popullit ukrainas. Sot përfundoi me sukses trajnimi gjashtë javor i grupit të parë të personelit Ukrainas në fushën e EOD, trajnim ky i realizuar nga instruktorët e FSK-së në bashkëpunim me Komandën Evropiane të Shteteve të Bashkuara të Amerikës. Ky trajnim përtej njohurive teorike, pajisë me aftësi praktike grupet e trajnuara ukrainase për të trajtuar në mënyrë efektive kërcënimet në formë të mjeteve shpërthyese duke mbrojtur kësisoj jetët dhe infrastrukturën kritike.  Asgjësimi i mjeteve shpërthyese është një aftësi kritike në zonat e konfliktit”, është shprehur Maqedonci.

Ai ka shtuar se ndihma e Kosovës për Ukrainën nuk do të kufizohet vetëm në trajnimin e forcave ukrainase, por do të vazhdohet me dërgimin e pakove të mbështetjes ushtarake për Ukrainën me automjete të blinduara e armatime.

Maqedonci tha se pakoja e parë mbështetëse nga Kosova për Ukrainën tashmë ka arritur atje.

“Shfrytëzoj rastin që t’ju njoftoj këtu që pako e parë mbështetëse me kamionë dhe automjete ushtarake tashmë ka arritur në Ukrainë dhe jemi në fazën e përgatitjeve përfundimtare për dërgimin e pakos së dytë mbështetëse. Si pjesë e Grupit të Kontaktit për Ukrainën do të kujdesemi që të ofrojmë kontributin tonë si shtet, brenda kapaciteteve buxhetore e logjistike të Kosovës. Përgëzoj të gjithë kursantët për përfundimin me sukses të këtij trajnimi dhe jam i bindur që njohuritë e fituara nga ky trajnim do t’i vini në shërbim të popullit dhe vendit tuaj”, ka thënë Maqedonci.

/The Geopost