Kievi tha se zbuloi një rrjet hungarez të spiunazhit, Budapesti dëbon diplomatë ukrainas

Agjencia kryesore e sigurisë e Ukrainës tha se ka zbuluar një rrjet spiunazhi të drejtuar nga Hungaria që po kërkonte informacione të ndjeshme për mbrojtjen ushtarake dhe opinionin publik në rajonin perëndimor të Zakarpatias, i cili kufizohet me Hungarinë dhe ka një popullsi të konsiderueshme me prejardhje hungareze.

Hungaria reagoi duke dëbuar dy diplomatë ukrainas që, sipas saj, konsideroheshin si spiunë, duke rritur tensionet mes dy vendeve fqinje, qeveritë e të cilave kanë mosmarrëveshje për shkak të luftës së Rusisë kundër Ukrainës.

Shërbimi i Sigurisë i Ukrainës (SBU) tha më 9 maj se ka arrestuar dy persona të dyshuar si agjentë në Zakarpatia –dhe pretendon se njeriu që i udhëhiqte ata është një punonjës i inteligjencës ushtarake hungareze.

SBU-ja tha se kjo është hera e parë që Ukraina zbulon një rrjet hungarez të spiunimit duke punuar për ta minuar sigurinë e vendit.

Ky njoftim vjen mes tensioneve midis Ukrainës dhe Hungarisë, ku kryeministri Viktor Orban ka ruajtur marrëdhënie të ngrohta me presidentin e Rusisë, Vladimir Putin, dhe ka kundërshtuar sanksionet ndaj Kremlinit, pavarësisht luftës së Moskës kundër Ukrainës.

Hungaria e ka mbrojtur Kievin në përpjekjet e tij për t’u mbrojtur shumë më pak sesa shumica e vendeve të tjera të Bashkimit Evropian dhe NATO-s.

Zhvillimi lidhet gjithashtu me situatën e ndërlikuar në Zakarpatia, ku kritikët e Kremlinit thonë se Rusia ka kërkuar të nxisë tensione midis hungarezëve etnikë dhe autoriteteve ukrainase.

Disa orë pas njoftimit të SBU-së, Ministri i Jashtëm i Hungarisë, Peter Szijjarto deklaroi se Hungaria ka dëbuar dy diplomatë nga Ambasada e Ukrainës në Budapest, të cilët ishin konsideruar si spiunë të maskuar. Në një video të postuar në Facebook, ai tha se një njoftim për dëbimet iu dorëzua ambasadorit ukrainas në Ministrinë e Jashtme.

I pyetur më herët për deklaratën e SBU-së, Szijjarto i tha televizionit ATV se Hungaria nuk ka marrë asnjë njoftim zyrtar për rastin nga Ukraina dhe se për momentin, “kjo duhet të trajtohet si propagandë”.

“[Përveç] luftës fizike [në Ukrainë], po zhvillohet edhe një luftë propagandistike”, tha Szijjarto. “Është e qartë se propaganda antihungareze përdoret shpesh në Ukrainë, propagandë kjo që në shumë raste ka rezultuar se nuk ka asnjë bazë”.

Qëllimet e supozuara të rrjetit ishin “mbledhja e të dhënave për mbrojtjen ushtarake të rajonit të Zakarpattias, kërkimi i pikave të dobëta në mbrojtjen tokësore dhe ajrore të rajonit, si dhe studimi i pikëpamjeve shoqërore dhe politike të banorëve vendas”, përfshirë mënyrën se si ata mund të reagojnë “nëse forcat hungareze hyjnë në rajon,” thuhet në deklaratën e SBU-së.

Zyra e kryeministrit hungarez dhe Ministria e Mbrojtjes nuk iu përgjigjën menjëherë kërkesave të REL-it për koment.

SBU-ja tha se një nga të dyshuarit është një ish-ushtar 40-vjeçar nga rrethi Berehove i Zakarpatias – ku jeton pakica etnike hungareze e Ukrainës prej rreth 100.000 vetash. Ai ishte rekrutuar në vitin 2021, dhe është përdorur nga drejtuesi i supozuar në shtator 2024.

SBU-ja pretendon se ka dokumente si dëshmi që tregojnë se i dyshuari po mblidhte informacion mbi vendndodhjen e sistemeve të mbrojtjes ajrore ukrainase dhe kapaciteteve të tjera ushtarake.

I dyshuari tjetër, një grua, është ish-anëtare e Forcave të Sigurisë dhe Mbrojtjes së Ukrainës, e cila dha dorëheqjen nga njësia e saj më herët këtë vit, thuhet në deklaratë.

Emrat e të dyshuarve nuk janë bërë të ditur.

/www.evropaelire.org