KFOR-i flet për incidentin në Zubin Potok: Ndodhi nga persona të panjohur dhe të armatosur

Të shtëna me armë zjarri kanë ndodhur mbrëmë në afërsi të patrullës së KFOR-it në veri të Kosovës.

KFOR-i ka konfirmuar mbrëmë se “ka dëgjuar dhe ka parë” të shtëna në afërsi të një patrulle të tij në Zubin Potok – njëra nga katër komunat e banuar me shumicë serbe në veri të Kosovës.

Misioni i NATO-s në Kosovë, në një përgjigje për Telegrafin ka bërë të ditur se është duke e hetuar këtë incident, dhe konfirmoi se i njëjti ka ndodhur nga persona të panjohur të cilët kanë qenë të armatosur.

“KFOR-i është duke hetuar një incident indirekt zjarri i cili ndodhi më 25 dhjetor në afërsi të patrullës së KFOR-it të NATO-s. Incidenti me persona të panjohur të armatosur ndodhi në zonën e Zubin Potokut. Nuk ka të lënduar apo dëme materiale dhe po punohet për zbardhjen e të gjitha fakteve”, thuhet në përgjigjen e KFOR-it.

KFOR ka theksuar se është e rëndësishme që palët të shmangin çdo retorikë që mund të shkaktoj tensione dhe të përshkallëzoj situatën.

“Duke qenë se janë planifikuar takime ndërmjet të gjitha palëve, është e rëndësishme që të gjithë të përfshirët të shmangin çdo retorikë apo veprim që mund të shkaktojë tensione dhe të përshkallëzojë situatën. Ne presim që të gjithë akterët të përmbahen nga shfaqjet provokuese të forcës dhe të kërkojnë zgjidhjen më të mirë për të garantuar sigurinë e të gjitha komuniteteve. Ne i nxisim të gjitha palët që të ndihmojnë në sigurimin dhe lirinë e lëvizjes në Kosovë dhe të parandalojnë narrativat mashtruese që të ndikojnë në procesin e dialogut”, kanë deklaruar ata.

#KFOR is investigating an indirect fire incident on 25 December in the close proximity of a @NATO_KFOR patrol. The incident involved unknown armed people in the Zubin Potok area. pic.twitter.com/1FsznDeWae

— @NATO – KFOR (@NATO_KFOR) December 26, 2022

KFOR ka shtuar se komandanti i këtij misioni të udhëhequr nga NATO vazhdon të mbështesë dialogun për të gjetur një marrëveshje për të zbutur tensionet në veri të Kosovës, duke theksuar se “ai mbetet në kontakt të ngushtë me të gjithë ata që janë përfshirë në këtë proces”.

“KFOR-i ka shtuar praninë dhe patrullimet e tij gjatë muajve të fundit. Ne mbetemi vigjilentë dhe plotësisht të aftë për të përmbushur mandatin tonë sipas Rezolutës 1244 të vitit 1999 për të gjitha komunitetet në Kosovë. Zgjidhjet duhet të kërkohen përmes dialogut”, përfundon përgjigjja e tyre.

Mediet serbe raportuan të dielën mbrëma se rreth orës 19:45 janë dëgjuar shkëmbime zjarri në Zubin Potok dhe se të shtënat kanë ndodhur pasi Policia e Kosovës “ka dashur të heqë njërën nga barrikadat” në këtë komunë në veri të Kosovës.

Por, Policia e Kosovës ka demantuar raportimet e mediave serbe se ka qenë e përfshirë në shkëmbim zjarri në Zubin Potok.

Besides attacking #Kosovo #Police, now #Serb criminals in the north of #Kosova supported by #Russians have attacked the #Latvian unit of @NATO_KFOR. Few minutes ago, Serb media reported that allegedly the Kosovo Police is attacking Serbs in the north.

— Agim Musliu (@agim_musliu) December 25, 2022

“Nuk ka pasur ndonjë sulm ndaj Policisë së Kosovës, e as nuk ka pasur ndonjë shkëmbim zjarri mes Policisë së Kosovës, apo ndonjë grupi. PK-ja nuk ka pasur shkëmbim zjarri ndaj askujt”, thuhet në njoftimin për media.

Grupe të qytetarëve serbë në veri ngritën barrikada qysh më 10 dhjetor, për të kundërshtuar arrestimin e ish-policit serb, Dejan Pantiq, nga Policia e Kosovës.

Ai u arrestua nën dyshimet për sulm kundër anëtarëve të Komisionit Qendror të Zgjedhjeve në veri.

Autoritetet në Kosovë thanë se kanë kapacitete për largimin e barrikadave të ngritura në veri, por se i kanë dhënë kohë misionit të NATO-s, KFOR, që ta bindë komunitetin lokal që t’i largojë vetë ato. /The Geopost/