“Jemi në prag të mbijetesës”, u thotë Zelensky deputetëve italianë

Presidenti ukrainas, Volodymyr Zelensky, i është drejtuar Parlamentit italian përmes video-lidhjes.

Ai u ka thënë deputetëve italianë se shteti i tij është në prag të mbijetesës së luftës me Rusinë dhe ka paralajmëruar se Moska dëshiron të depërtojë në pjesën tjetër të Evropës, ka raportuar agjencia e lajmeve, Reuters.

“Për trupat ruse, Ukraina është porta e Evropës, ata duan të hyjnë brenda, mirëpo barbarizmi nuk duhet të depërtojë”, ka thënë ai.

Ai ka përsëritur thirrjet e bëra në adresimet para parlamenteve të shteteve tjera, që Rusia të sanksionohet më shumë.

Kryeministri italian, Mario Draghi, ka thënë se shteti i tij dëshiron ta shohë Ukrainën në Bashkimin Evropian dhe se duhet ofruar ndihmë ushtarake për të, në mënyrë që të ndalen masakrat.

OBSH: 62 sulme në objektet shëndetësore në Ukrainë

Organizata Botërore e Shëndetësisë (OBSH) ka raportuar se ka konfirmuar 62 sulme të veçanta në objektet shëndetësore në Ukrainë, që nga fillimi i pushtimit rus gati katër javë më parë.

Organizata tha se nga këto sulme u vranë 15 persona dhe të paktën 37 u plagosën.

Ndërkohë, zyrtarët e OBSH-së në Poloni thonë se një vlerësim i shpejtë tregon se rreth gjysmë milioni refugjatë që kanë arritur atje kanë probleme psikologjike, kryesisht për shkak të traumave.

Gjithashtu, punonjësit e shëndetësisë në kufi, raportojnë për ardhjen e fëmijëve dhe nënave që vuajnë nga rraskapitja dhe dehidratimi, ndërsa shumë të moshuar vijnë pas disa ditësh udhëtim pa mjekim, veçanërisht për sëmundje të tilla si diabeti dhe presioni i lartë i gjakut.

Agjencia e Kombeve të Bashkuara për refugjatë (UNHCR) thekson se 3,5 milionë njerëz kanë ikur nga Ukraina.

Ukraina: 117 fëmijë të vrarë në luftë

Së paku 117 fëmijë janë vrarë dhe mbi 155 të tjerë janë plagosur qëkur Rusia ka nisur pushtimin e Ukrainës, më 24 shkurt, tha të martën Zyra e Prokurorit të Përgjithshëm të Ukrainës.

Sipas saj, shumica e viktimave janë raportuar në ose rreth kryeqytetit Kiev dhe në qytetin verilindor të Harkivit.

Në Harkiv, një tank rus raportohet se ka goditur një makinë, në të cilën ndodhej një familje me dy fëmijë, tha Zyra e Prokurorit.

Në qytetin e rrethuar të Mariupolit, shtoi ajo, autobusët e evakuimit që kanë transportuar fëmijë, janë goditur nga granatimet ruse.

Prokurorët po ashtu thanë se kanë regjistruar 548 sulme mbi shkolla dhe objekte të tjera arsimore – 72 prej të cilave janë “shkatërruar plotësisht”.

Sipas prokurorëve, shifrat që ata raportojnë, nuk janë përfundimtare, për shkak të vështirësive në qasjen apo inspektimin e vendeve në disa pjesë të Ukrainës.

Ukrainasit po përjetojnë ferrin, thotë Guterres

Sekretari i Përgjithshëm i Kombeve të Bashkuara, Antonio Guterres bëri thirrje që t’i jepet fund “luftës absurde” të nisur nga Rusia në Ukrainë.

Ai paralajmëroi të martën se konflikti “nuk po shkon asgjëkund, shpejt” dhe se populli ukrainas “po përjeton ferr”.

“Vazhdimi i luftës në Ukrainë është moralisht e papranueshme, politikisht e papërligjshme dhe ushtarakisht absurde”, u tha Guterres gazetarëve.