Ish-truproja e Macron u vu nën hetim për lidhjet e kontratës me Rusinë

Alexandre Benalla, ish-truproja i diskredituar i presidentit francez Emmanuel Macron, u vu nën hetim zyrtar për një kontratë sigurie të nënshkruar nga një bashkëpunëtor me një oligark rus, sipas burimeve të sigurisë.

Benalla, i cili u pushua nga puna në vitin 2018 pasi u filmua duke sulmuar protestuesit, u arrestua nga policia e specializuar kundër korrupsionit së bashku me gruan e tij si pjesë e një hetimi mbi marrëdhëniet e biznesit të ish-bashkëpunëtorit të tij, Vincent Crase, thanë burimet franceze të sigurisë për AFP-në.

Crase, një ish-polic që dikur merrej me sigurinë për partinë politike të Macron, u tha hetuesve në vitin 2019 se marrëveshja me oligarkun rus Iskander Makhmudov mbulonte sigurinë për të dhe fëmijët e tij në Francë dhe Monako.

Benalla mohoi të kishte lidhje me kontratën kur ai u mor në pyetje nga një komision parlamentar në 2018.

30-vjeçari, ish-roje i klubeve të natës, ishte dikur i afërt me Macron, por që atëherë është bërë një siklet për kreun e shtetit.

Hetuesit francezë po hetojnë pastrimin e mundshëm të parave dhe korrupsionin në marrëveshjen midis kompanisë së Crase dhe Makhmudov, i cili njihet si i afërt me liderin rus Vladimir Putin.

Faqja investigative franceze e internetit, Mediapart, raportoi në dhjetor të 2019-ës se marrëveshja ishte në vlerë të 294,000 eurove (333,000 dollarëve).

Test i madh për presidencën e Macron

 Zhvillimi i fundit në atë që është quajtur “Benallagate” në shtypin francez erdhi një muaj pasi ish-truproja i papëlqyer u dënua për sulmin ndaj dy demonstruesve të rinj gjatë një demonstrate antikapitaliste në vitin 2018, si dhe për falsifikim dokumentesh dhe mbajtje të paligjshme të një arme zjarri.

Macron e shkarkoi Benalla-n pasi u shfaq një videoklip i incidentit të vitit 2018, ku ai shihej duke goditur një të ri dhe duke kapur nga qafa një grua të re në një protestë të 1 Majit në Paris.

Ish-roja mbante një helmetë policie, edhe pse i ishte dhënë leje vetëm për të ndjekur protestën si vëzhgues.

“Benallagate” hyri në provën e parë të madhe për presidencën e Macron, i cili u akuzua për mbulim për dështimin e raportimit të Benalla në polici derisa e përditshmja franceze Le Monde zbuloi ekzistencën e videos dy muaj pas incidentit.

Benalla mohoi akuzat në gjyqin e tij, duke thënë se ai kishte vepruar “me refleks” për të ndihmuar oficerët të arrestonin protestuesit e padisiplinuar.

Pas shpërthimit të skandalit, Benalla pranoi gjithashtu se mbante një pistoletë gjatë daljeve me Macron, edhe pse ai ishte i autorizuar ta mbante atë vetëm brenda selisë së partisë së Macron, ku ai kishte pseudonimin “Rambo”.

Hetuesit zbuluan se ai vazhdoi të përdorte pasaporta diplomatike për udhëtime në Afrikë dhe Izrael, ku po përpiqej të krijonte një biznes konsulence.

Ai u shpall fajtor edhe për përdorimin e dokumenteve të falsifikuara për të marrë një nga pasaportat.