Eurodeputeti kroat Tonino Picula vlerësoi në Zagreb se negociatat e mëtejshme me Serbinë nuk duhet të vazhdojnë nëse ky vend nuk përafrohet me politikën e jashtme evropiane dhe vendos sanksione ndaj Rusisë.
“Vuçiq do të duhet të zgjidhë problemin se ku i takon në të vërtetë Serbia. Ajo nuk duhet t’i kthejë shpinën Perëndimit, por t’i bashkohet atij”, tha Picula, raportuesi i Parlamentit Evropian për rekomandimet për strategjinë e re të zgjerimit të Bashkimit Evropian.
Ai tha këtë në një panel të organizuar nga Zyra e BE-së për ndikimin e situatës gjeopolitike në politikën e zgjerimit, strategjinë e re dhe ndryshimet e propozuara nga PE në procesin e anëtarësimit, transmeton agjencia Hina.
“Ne do të donim që negociatat e mëtejshme me Serbinë të vazhdojnë vetëm nëse ai vend përputhet me politikën e jashtme evropiane dhe vendos sanksione ndaj Federatës Ruse”, theksoi Picula, i cili prezantoi një strategji të re që duhet të miratohet nga PE në nëntor.
Ish-ministrja e Jashtme kroate, Vesna Pusiç, tha se mendon se Serbia përfundimisht do të përfundojë në mesin e vendeve të BE-së. Megjithatë, ajo shtoi se pyetja është se sa do të zgjasë dhe sa probleme dhe kërcënime të mundshme të sigurisë do të krijohen ndërkohë nga një politikë e tillë aktuale.
Sa i përket Bosnjës dhe Hercegovinës, Pusiç vlerësoi se liderët aktualë politikë në atë vend kanë “frikë vdekjeje” nga BE-ja, sepse do të përfundonin në burg për shkak të korrupsionit, nëse hyjnë në BE.
“Prandaj janë kundër BE-së. Me liderët politikë Çoviq, Izetbegoviq dhe Dodik, Bosnja dhe Hercegovina nuk do të përparojë kurrë drejt BE-së”, tha ish-ministrja e jashtme kroate.
Eurodeputeti kroat Tomislav Sokol (HDZ) vlerësoi se Serbia është burim i destabilitetit në këtë pjesë të Evropës, e ndërthurur me shërbimin sekret rus.
Ai tha se Serbia ka një politikë ekspansioniste që është më e dukshme në Mal të Zi, si dhe se presidenti i Serbisë “ulet në dy karrige” dhe shikon BE-në me “gishtat e kryqëzuar në xhep”.
Duke folur për Bosnjën dhe Hercegovinën, Sokol tha se kroatët në atë vend janë të vetmit që duan realisht të anëtarësohen në BE./Beta
Duriq: Radoiçiq dhe Veselinoviq janë dy kriminelët më të mëdhenj në Serbi 
Sputnik përhap dezninformata për Bondstillin, thotë se Serbia, Rusia dhe Kina duhet të japin pëlqimin 
Kosova në fushatën zgjedhore në Serbi: Retorikë nacionaliste, pak zgjidhje konkrete 
Mali i Zi dëbon drejtuesin e rrjetit rus ‘Ribar’ dhe bashkëpunëtorët e tij, ambasadori i përcjell drejt Beogradit 
Burnham: Rusia ndërhyri në referendumin e Brexit-it, Franca dhe Gjermania të kujdesshme ndaj Moskës 
Zaharova flet për ndërhyrje të huaja, ndërsa dokumentet dëshmojnë ndikimin rus në zgjedhjet në Ballkan