Estonia vendos tela të mprehtë përgjatë kufirit me Rusinë

Qeveria e Estonisë ka ftuar 1700 ushtarë rezervë të saj të mërkurën për një stërvitje të paparalajmëruar, e cila do të përfshijë instalimin e një pengese telash të mprehtë në një gjatësi prej 40 kilometrash të kufirit të saj me Rusinë, ndërsa kriza e migracionit në Bjellorusinë në fqinjësi po intensifikohet, njofton Reuters.

Bashkimi Evropian e ka akuzuar Bjellorusinë për sigurimin e fluturimeve për mijëra emigrantë nga Lindja e Mesme dhe Afrika, duke i shtyrë ata të kalojnë në Poloninë, Lituaninë dhe Letoninë fqinje, anëtare të BE-së dhe NATO-s, si hakmarrje për sanksionet e vendosura tashmë ndaj Minskut. Bjellorusia ka mohuar se ka nxitur qëllimisht krizën.

Fqinjët e BE-së me Bjellorusinë, e cila është një aleat i ngushtë i Rusisë, kanë paralajmëruar se kriza mund të çojë në një përplasje ushtarake dhe kanë shpallur gjendje të jashtëzakonshme duke vendosur forca ushtarake pranë kufijve të tyre.

Estonia ka një histori gjeopolitike të ngjashme me Lituaninë dhe Letoninë, megjithëse nuk është në kufi me Bjellorusinë.

Stërvitja e parakohshme është planifikuar të zgjasë deri më 25 nëntor dhe u thirr për të testuar reagimin e shpejtë të zinxhirit kombëtar të komandës, tha qeveria estoneze.

Ushtarët rezervë do të ndihmojnë në instalimin e 40 km tela të mprehtë në vendet përgjatë kufirit rus, ku rreziqet e kalimeve të paligjshme janë më të larta, tha policia estoneze dhe roja e saj kufitare në një deklaratë të përbashkët.

“Ajo që po ndodh në Poloni, Lituani dhe Letoni kërkon gjithashtu forcimin e infrastrukturës kufitare në Estoni,” tha shefi i policisë dhe rojeve kufitare, Elmar Vaher.