Duma kërkon nga Vladimir Putini njohjen e pavarësisë së dy rajoneve ukrainase nga Rusia

Dhoma e ulët e Parlamentit rus ka votuar për t’i kërkuar zyrtarisht presidentit Vladimir Putin që të njohë entitetet separatiste në Ukrainën lindore, duke rritur potencialisht tensionet.

Kryetari i Dumës, Vyacheslav Volodin tha se rezoluta do t’i dërgohet presidentit “menjëherë”.

Kremlini deri më tani nuk e ka deklaruar publikisht qëndrimin e tij mbi këtë propozim. Duma hodhi poshtë një draft të propozuar nga partia në pushtet “Rusia e Bashkuar” për të dërguar rezolutën në Ministrinë e Jashtme për shqyrtim.

Rusia ka mbështetur ushtarakisht dhe financiarisht kuazi-shtetet e shkëputura të të ashtuquajturave Republika Popullore në Donetsk dhe Luhansk që nga formimi i tyre në 2014. Zyrtarisht ajo mohon çdo mbështetje të armatosur dhe mbështet një plan paqeje që kërkon riintegrimin e tyre në Ukrainë.

Njohja mund të komplikojë ose prishë përpjekjet për të zbatuar atë pakt dhe potencialisht t’i hapë rrugën Moskës për të furnizuar hapur më shumë armë për republikat, diçka që partia në pushtet ka propozuar tashmë.

Pas këtij veprimi, valuta ruse ka shënuar një rënie të theksuar. Aktualisht rubla kundrejt dollarit amerikan po tregtohet me 75.5 nga 74.3 që ishte gjatë ditës së djeshme. /The Geopost/