Deputeti ukrainas: Vuçiq është manipulues, Putin ka shumë ndikim në Serbi dhe i nevojiten përleshjet në rajon

Deputeti i Ukrainës Oleksiy Goncharenko ka paralajmëruar për rrezikun e presidentit rus Vladimir Putin në rajonin e Ballkanit Perëndimor.

Goncharenko ka thënë se Rusisë i konvenojnë përleshjet në rajon dhe tha se Rusia ka ndikim në Serbi.

“Jam i sigurt se Rusia me të vërtetë dëshiron të ndërhyjë, sepse për Putinin, çdo destabilizim është tashmë një fitore. Ai ka shumë ndikim në Serbi dhe unë do të isha shumë i kujdesshëm për këtë. Përleshjet e ardhshme të Putinit janë shumë të nevojshme, ne duhet të largojmë vëmendjen nga lufta në Ukrainë, në mënyrë që bota të na ndihmojë më pak në mënyrë aktive. Prandaj, nuk do të habitem që ai do të bëjë gjithçka për ta bërë Ballkanin të parehatuar. Ju duhet të jeni shumë të kujdesshëm për këtë. Provokimet nuk lejohen”, ka thënë ai për Gazetën Express.

Goncharenko për deklaratën e Presidentit të Serbisë, që ka thënë se Ukraina nëse e njeh Kosovën, në një ditë humbet gjithçka”, tha se ai është manipulues.

“Siç thashë, Vuçiq është manipulues. Ai flet për marrëdhënie të mira mes vendeve tona. Le të fillojmë me më të dukshmen apo jo? A ka vendosur Serbia sanksione kundër Rusisë? Jo. A e mbështet në mënyrë aktive pozicionin e Ukrainës? S’e shoh as këtë. Do të doja të dëgjoja nga presidenti Vuçiq, çfarë saktësisht do të humbasim?”.

Goncharenko tha se në Ukrainë ka mendime edhe pro edhe kundër njohjes së pavarësisë së Kosovës.

“Në shoqërinë tonë ende ka debate për njohjen e pavarësisë së Kosovës, disa deputetë janë pro, disa janë kundër. Por presidenti Vuçiq tha se deklarata të tilla nga ana jonë do të shkelin normat e së drejtës ndërkombëtare. Ky është manipulim. Në vitin 2010, Gjykata Ndërkombëtare e Drejtësisë e OKB-së pranoi se shpallja e pavarësisë së Kosovës ishte në përputhje me të drejtën ndërkombëtare. Për mendimin tim, njohja e pavarësisë së Kosovës është një vendim i domosdoshëm”.

Goncharenko thotë se nuk e di se çfarë pozicioni ka tani presidenti Zelensky rreth Kosovës, por në pyetjen nëse Perëndimi po ia kërkon Ukrainës t’i bashkohet në njohjen e pavarësisë së Kosovës, deputeti thotë se Ukraina është një shtet i pavarur që merr vendimet e veta dhe udhëheq politikën e saj të brendshme dhe të jashtme. /Geopost/