Dëbimi i aktivistëve nga Serbia: Një tjetër dëshmi e pushtetit represiv

Rastet e fundit të dëbimeve të aktivistëve nga Serbia kanë shkaktuar reagime të forta nga organizatat ndërkombëtare dhe vendet fqinje, duke vënë në dukje një tendencë shqetësuese të shkeljeve të të drejtave të njeriut nën pretekstin e “sigurisë kombëtare”.

Ministria e Jashtme rumune njoftoi se një shtetas rumun, anëtar i një OJQ-je, u dëbua nga Serbia pasi u ndalua në Beograd më 21 janar. Ai u ndalua dhe u dërgua në një stacion policie teksa ndiqte një seminar së bashku me pjesëmarrësit e tjerë. Pa një shpjegim të detajuar, ai është urdhëruar të largohet nga Serbia brenda 24 orëve, me një vit ndalim të hyrjes, për shkak të “sigurisë kombëtare”.

Ambasada rumune në Beograd ka kërkuar shpjegime nga autoritetet serbe por deri më tani nuk ka marrë përgjigje të kënaqshme.

Një incident i ngjashëm ndodhi me pesë shtetas kroatë, anëtarë të sektorit të OJQ-ve, të cilët gjithashtu u dëbuan nga Serbia në rrethana të ngjashme. Ministria kroate e Punëve të Jashtme dhe Evropiane i dërgoi Serbisë një notë proteste duke kërkuar shpjegim për këtë. Ministri Gordan Grliq Radman dënoi ndalimin e qytetarëve kroatë pa asnjë shpjegim, duke e cilësuar atë si një akt të papranueshëm represioni. Ministria gjithashtu u bëri thirrje të gjithë qytetarëve kroatë që të jenë të kujdesshëm kur udhëtojnë për në Serbi dhe të informohen para se të udhëtojnë.

Bashkimi Evropian ka shprehur shqetësimin e tij për këto ngjarje. Zëdhënësi i Komisionit Evropian Guillaume Mercier tha se ishte e papranueshme që aktivistët paqësorë të shoqërisë civile të etiketohen si “rrezik sigurie” dhe t’u nënshtrohen masave të tilla. Ai u bëri thirrje autoriteteve serbe që të respektojnë të drejtat themelore të njeriut dhe të lejojnë organizatat e shoqërisë civile të punojnë pa pengesa.