Abasada ruse në Shkup me paralajmërim kërcënues: I evidentojmë të gjitha rastet e rusofobisë

Ambasada e Federatës Ruse në Shkup ka paralajmëruar opinionin e vendit se “po evidenton çdo rast të rusofobisë”

Në një post në Twitter, kjo ambasadë ka shkruar: “Ua tërheqim vëmendjen për nivelin e paprecedentë të rusofobisë që vërehet në shumë vende të huaja në sfondin e operacionit special ushtarak në Ukrainë. U paralajmërojmë se të gjitha incidentet e tilla regjistrohen me kujdes.”

Por kjo nuk ka ndaluar që disa qytetarë sot të protestojnë kundër agresionit rus në Ukrainë. Kjo protestë ishte organizuar nga Shoqata e Ukrainasve në Maqedoninë e Veriut.

“Ekziston një kërcënim për të gjithë Evropën nga një sulm bërthamor. Putini do të bëjë çmos që ta pushtojë Ukrainën. Ai është monstruoz dhe do të hyjë në histori si një pushtues i madh,” tha Aleksandar Urbanoviç, president i Shoqatës së Ukrainasve në Maqedoninë e Veriut.

Ai theksoi se protesta erdhi në mbështetje të Ukrainës.  “Dua që vendi të çlirohet dhe të ketë paqe.”, tha Urbanoviç.

Marjana Velkovska nga Shoqata e Ukrainasve në Maqedoni thotë se të gjithë qytetarët në Ukrainë kanë nevojë për ndihmë.

“Unë kam të afërm atje, ata janë të gatshëm të qëndrojnë atje dhe të luftojnë për vendin e tyre”, tha Velkovska, duke shtuar se kanë nevojë për ndihmë.